OEKUSI, 06 Maiu 2025 (TATOLI) – Autoridade Rejiaun Administrativa Espesiál Oekusi Ambeno (RAEOA) liuhusi Sekretáriu Rejionál Saúde, Luís de Jesus Neno, planu atu harii fasilidade saúde hodi fó atendimentu ba komunidade sira iha bairru Naktuka, suku Bene-Ufe, sub-rejiaun Nítibe.
“Bairru Naktuka iha problema bo’ot kuandu tempu udan, mota tuun sira la asesu tratamentu iha Bitila no postu saúde Manán, sira preokupa tebes tanba ne’e mak ami mós deskute ona atu destaka fatin tratamentu ida iha Naktuka, tanba komunidade barak atu bá asesu fasilidade saúde la’o dook,” Sekretáriu Rejionál Saúde, Luís de Jesus Neno ba jornalista sira iha Oekusi, ohin.
Notísia relevante:Autoridade RAEOA lansa programa atendimentu saúde iha fatin izoladu 11
Nia informa, pesoál saúde ne’ebé sei koloka iha fatin tratamentu suku ne’e hamutuk na’in-rua, komposta husu saúde públika ida ho enfermeiru ida, bainhira iha partu ruma maka sei apoia husi postu saúde Manán tanba parteira konsentra iha postu saúde referidu.
Antes ne’e, Delegada aldeia Lamasin suku Bene-Ufe, Rud Sila, rekomenda ba Autoridade RAEOA liuliu servisu saúde atu konstrui fasilidade saúde iha Naktuka, tanba kona-ba mak prepara rai, nune’e parte autoridade ba konstrui de’it.
“Ami-nia preokupasaun durante ne’e mak saúde husi Naktuka ba to’o postu saúde Manán do’ok no haka’at mota, ida-ne’e mós fó impaktu mai ami kuandu mota tuun ami labele ultrapasa, tanba ne’e ami husu tau netik fasilidade saúde iha ami-nia bairru, atu fó tratamentu mai ami,” nia dehan.
Notísia relevante:Autoridade RAEOA planu mellora programa atendimentu saúde iha fatin izoladu hitu
Tuir dadus husi Sekretáriu Rejionál ba Asuntu Saúde hatudu destaka ona fatin tratamentu 11 iha fatin izoladu no distánsia dook husi postu saúde mak hanesan, iha sub-rejiaun Pante Makasar estabelese iha suku Costa iha aldeia Lakufoan no Kutete, suku Cunha estabelese iha aldeia Sonamnasi no suku Taiboko estabelese iha aldeia Ulas.
Iha sub-rejiaun Nítibe, estabelese iha suku Bene-Ufe iha aldeia Lamasin, suku Lela-Ufe estabelese iha aldeia Netenbitimo no suku Ban-Afi iha aldeia Hautefo.
Iha sub-rejiaun Pássabe, estabelese iha suku Abani aldeia Naetuna, sub-rejiaun Oésilo estebelese iha suku Usitasa’e aldeia Pune bairru Lil-As no aldeia Buqui bairru Hau-Ana no suku Bobometo iha aldeia Nonquican.
Notísia relevante:Aldeia Manán seidauk asesu ba rede telekomunikasaun
Jornalista: Abílio Elo Nini
Editór: Florencio Miranda Ximenes
