OEKUSI, 12 Marsu 2025 (TATOLI) – Autoridade Rejiaun Administrativa Espesiál Oekusi Ambeno (RAEOA) liuhusi Sekretáriu Rejionál ba Asuntu Saúde, planu atu mellora no aumenta tan programa atendimentu saúde iha fatin izoladu hitu.
“Ita nia planu servisu saúde Oekusi, atu aumenta atendimentu saúde ba fatin izoladu hitu, tanba antes ne’e, ita harii ona fatin tratamentu 11 iha fatin-ne’ebé distánsia do’ok husi fasilidade saúde no konsidera fatin izoladu, ho objetivu atu komunidade tomak bele hetan asesu ba tratamentu saúde ho gratuitamente,” Sekretáriu Rejionál ba Asuntu Saúde, Luís de Jesus Neno ba Ajénsia Tatoli iha Oekusi, ohin.
Notísia relevante:Autoridade RAEOA lansa programa atendimentu saúde iha fatin izoladu 11
Dirijente saúde Oekusi ne’e, informa tan autoridade kria fatin sira-ne’e atubele akumula komunidade sira-ne’ebé hela do’ok liuliu ferik-katuas sira ne’ebé idade avansadu ona no labele la’o ain kle’ur tanba transporte laiha, tan ne’e ho meiu ida-ne’e sira bele hetan asesu ba tratamentu saúde.
“Ita iha planu atu aumenta hitu ne’e, maibé ita la’o lai ho fatin 11 ne’e, iha trimestre primeiru ne’e ita sei haree liuhusi evaluasaun, karik atividade saúde iha fatin sira-ne’e iha benefisíu di’ak no karik hatudu kobertura di’ak, entaun ita sei aumenta tan ba fatin sira-ne’ebé seidauk hetan,” nia informa.
Tuir nia, ekipa saúde identifika ona fatin hitu, maibé labele informa ba públiku, tanba bainhira planu ne’e atu aumenta sei afeta ba problema rekursu umanu, entaun sei halo rekrutamentu ba pesoál saúde mak foin estabelese.
“Agora fatin 11 ne’e kada suku ita destaka pesoál saúde na’in-rua, parteira ida no infermeira, tanba ita menús iha médiku minimu tebes, maibé ita espera katak fatin sira-ne’ebé iha exemplu sentru saúde no ospitál referál presiza halo kompleta, nune’e bainhira sira iha fatin tratamentu suku iha problema ruma atu refere mai iha ospitál bele hetan atendimentu di’ak,” nia informa.
Entretantu, totál pesoál saúde iha Oé-Cusse hamutuk 427 destaka ba servisu saúde rejionál, Ospitál Referál Oekusi, sentru saúde lima no postu saúde 20 iha Oekusi no fatin tratamentu suku iha fatin izoladu 11, inklui pontu entrada fronteira Sakato internasionál Rota do Sândallo no Aeroportu.
Notísia relevante:Primeiru-Ministru lansa dijitalizasaun sistema saúde iha RAEOA
Jornalista: Abílio Elo Nini
Editór: Florencio Miranda Ximenes
