OÉ-CUSSE, 10 Dezembru 2024 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), liuhusi Sekretaria Rejionál ba Asuntu Saúde, halo lansamentu, iha aldeia Lakufoan, suku Costa, programa atendimentu saúde ba fatin izoladu 11.
Sekretáriu Rejionál ba Asuntu Saúde, Luís de Jesus Neno, hateten polítika ida ne’e atu hakbesik atendimentu saúde ba komunidade sira, tanba tinan barak asesu bá instalasaun saúde ho distánsia dook.
“Komunidade liuliu iha fatin izoladu seidauk hetan atendimentu di’ak husi saúde, entaun ita identifika fatin sira dook tebes husi instalasaun saúde no hili sede aldeia sira atu tau ai-moruk ho pesoál saúde. Nune’e, kada loron bele fó atendimentu ba komunidade sira iha baze”, Luís de Jesus Neno dehan iha aldeia Lakufoan.
Notísia relevante: Servisu Saúde Oé-Cusse rejista pasiente TBC 102 no hitu lakon vida
Dirijente Saúde Oé-Cusse ne’e informa katak fatin 11 ne’ebé Servisu Saúde identifika mak iha sub-rejiaun Pante Makasar estabelese iha suku Costa, iha aldeia Lakufoan no Kutete, suku Cunha estabelese iha aldeia Sonamnasi no suku Taiboko estabelese iha aldeia Ulas.
Iha sub-rejiaun Nítibe estabelese iha suku Bene-Ufe iha ba aldeia Lamasin, suku Lela-Ufe iha aldeia Netembitimo no suku Ban-Afi iha aldeia Hautefo.
Iha sub-rejiaun Pássabe estabelese iha suku Abani iha aldeia Naetuna, sub-rejiaun Oésilo eiha suku Usitasa’e iha aldeia Pune no Buqui bairru no iha suku Bobometo iha aldeia Nonquican.
“Fatin sira-ne’e kada tinan sempre hamosu problema ba saúde. Inan isin-rua balun partu mate, balun partu bebé mak mate no inan moris, katuas-ferik sira la’o labele lahetan asesu bá saúde, entaun fatin sira-ne’e mak ami hili hodi tau pesoál saúde no ai-moruk hodi fó atendimentu ba komunidade, nune’e bele kontribui ba redusan kazu moras no mate iha Oé-Cusse”, dehan.
Kona-ba rekusu umanu, Servisu Saúde, antes ne’e, halo ona rekrutamentu ba pesoál saúde hamutuk na’in-62 atu koloka iha fatin 11 ne’e, inklui haforsa tan Servisu Saúde iha postu saúde no sentru saúde sira ho intensaun bele kombate moras iha Oé-Cusse.
Nia esplika katak polítika estabelese Servisu Saúde iha fatin 11 ne’e nia prosesu atendimentu hanesan mós postu saúde sira, tratamentu hothotu bele konsetradu, maibé bainhira iha moras grave ka todan bele transfere bá hospitál referénsia.
Notísia relevante: Sekretáriu Rejionál Saúde Oé-Cusse otimista rezolve kazu má-nutrisaun
Iha biban ne’e, xefe suku Costa, Francisco Colo, agradese ba Governu liuliu Servisu Saúde Oé-Cusse tanba tinan barak komunidade iha aldeia Lakufoan iha uma-kain hamutuk 185 ho totál populasaun 768 asesu bá saúde dook husi hela fatin. Maibé, iha tinan ne’e, bele hakbesik atendimentu saúde ba komunidade.
“Sente kontente tanba durante tinan barak ona komunidade iha ne’e ladún toma atensaun kona-ba atendimentu saúde, tanba ne’e nu’udar autoridade lokál espera ho prezensa Servisu Saúde iha aldeia Lakufoan, komunidade bele promove liña koordenasaun, nune’e bele garante atendimentu saúde la’o ho séguru no fó duni benefísiu ba komunidade nia saúde”, nia espera.
Notísia relevante: INCSIDA husu Oé-Cusse oan hamutuk kombate tranzmisaun VIH/Sida
Tuir observasaun, hafoin Sekretáriu Rejonál Saúde halo lansa programa ne’e, kontinua destaka kedas profisionál saúde na’in-rua iha sede aldeia Lakufoan mak hanesan parteira ida no enfermeiru ida.
Totál postu saúde iha Oé-Cusse hamutuk 20 ne’ebé kobre suku 18 ho sentru saúde lima iha sub-rejiaun haat no Ospitál Referénsia ida iha Oé-Cusse Vila.
Jornalista: Abílio Elo Nini
Editora: Maria Auxiliadora
