Aldeia Manán seidauk asesu ba rede telekomunikasaun
OÉ-CUSSE, 26 Agostu 2024 (TATOLI) –Aldeia Manán iha suku Bene-Ufe, sub-rejiaun Nítibe, Rejiaun Administrativa Espesiál Oé-Cusse Ambeno (RAEOA) ho nia abitante hamutuk 186 ne’e, to’o agora, seidauk asesu ba rede telekomunikasaun.
Tanba ne’e, xefe suku Bene-Ufe, Marcos Meni, hato’o preokupasaun ne’e ba Sekretáriu Rejionál ba Asuntu Saúde, Luís de Jesus Neno, tanba bainhira atu komunika ba malu kona-ba asuntu saúde difísil tebes.
“Ami iha ne’e susar ba rede. Kuandu atu koordena serbisu, liuliu ba saúde, komunidade moras no persiza apoia urjénsia ka dezastre ruma tenke halai bá fatin dook, kilómetru ida-resin mak foin hetan jaringan atu kontaktu. Fatin baibain ami hetan rede mak bá mota no sede suku iha Citrana”, Marcos Meni hato’o lamentasaun ne’e iha postu saúde Bitila.
Notísia relevante: Sekretáriu Saúde Rejionál solusiona problema falta bee-moos iha Postu Saúde Bitila
Nia lembra katak iha mandatu autoridade anteriór nian, hato’o ona pedidu ba operadora telekomunikasaun Telemor no Timor Telecom no konsege haree ona fatin iha suku Bene-Ufe, maibé seidauk iha solusaun.
“Ha’u prepara tan pedidu ho dadus kliente ne’ebé la asesu ba rede ne’e hamutuk 186 atu haruka ba autoridade RAEOA, liuliu ba Sekretáriu Rejionál ba Saúde no Sekretáriu Rejionál Administrasaun atu koordena ho empreza Telemor ho Timor Telecom atu haree ida ne’e”, nia informa.
Xefe sentru saúde Nítibe, António Fernandes Caet, rekoñese katak bainhira inan atu partu iha uma ka kazu urjénsia, komunidade tenke buka fatin hodi hetan rede atu komunika ho profisionál saúde atu hetan apoiu husi sira.
“Ba problema rede ne’e la’ós agora, maibé tinan barak ona. Ami buka mekanizmu, pesoál saúde sira uza Telekomcel Indonézia hodi komunika liuhusi WhatsApp, nune’e bele komunika ba postu saúde hodi apoia pasiente, maibé loloos ne’e tenke asesu ba telekomunikasaun sira hanesan Telemor no Timor Telecom. Tanba nesesidade tenke uza viziñu sira-nian”, nia hateten.
Hatán ba kestaun ne’e, Sekretáriu Rejionál ba Asuntu Saúde, Luís de Jesus Neno, promete sei informa asuntu ne’e iha reuniaun membru autoridade RAEOA, nune’e bele buka solusaun.
“Iha enkontru autoridade, ha’u sei levanta problema ne’e para ami buka solusaun, nune’e komunidade la’ós iha Bitila de’it, maibé Biele, inklui suku Taiboko mós seidauk asesu ba rede telekomunikasaun, nomós fatin balun iha sub-rejiaun Oésilo, iha suku Usitasa’e, aldeia Boqui mós la asesu”, nia promete.
Notísia relevante: MS halo advokasia kona-ba Programa Malária iha suku Bene-Ufe
Jornalista: Abílio Elo Nini
Editora: Maria Auxiliadora
