OÉ-CUSSE, 23 Agostu 2024 (TATOLI) – Sekretáriu Rejionál ba Asuntu Saúde, Luís de Jesus Neno, ho inisiativa rasik sosa poli pipa metru 200 hodi dada bee-moos ba Postu Saúde Bitila, suku Bene-Ufe, sub-rejiaun Nítibe, Rejiaun Administrativa Espesiál Oé-Cusse Ambeno (RAEOA), tanba tinan barak efrenta falta bee-moos.
“Problema bee-moos iha Postu Saúde Bitila akontese kle’ur ona, maibé ha’u rasik mak kontribui sosa poli pipa no husu apoiu husi Servisu Água no Saneamentu mak mai instala ona. Agora, laiha ona problema kona-ba bee-moos, tanba antes ne’e fó impaktu tebes ba postu bainhira presiza bee-moos”, Luís de Jesus Neno relata iha suku Bene-Ufe.
Notísia relevante: PA RAEOA inaugura kuarentena Nítibe
Xefe suku Bene-Ufe, Marcos Meni, informa kona-ba problema falta bee ne’e, nia aprezenta ona proposta ba autoridade RAOEA, maibé laiha resposta.
“Ha’u bá haree postu Bitila, maibé atu halo oinsá? Uluk kedan ha’u hato’o proposta ba autoridade RAEOA, maibé la apoia, tan ne’e mak horisehik iha inisiativa ida husi Sekretáriu Rejionál Saúde apoia poli pipa atu dada bee husi bee-matan mai, ne’ebé ohin bá oin sei laiha ona problema ba bee”, nia asegura.
Iha sorin seluk, Xefe Sentru Saúde Nítibe, António Fernandes Caet, relata, durante ne’e, profisionál saúde sira hetan apoiu bee-moos husi viziñu, tanba dezde edifisíu ne’e konstrui iha 2021 laiha fornesimentu bee-moos iha postu ne’e rasik.
“Postu Saúde Bitila dezde inisíu la asesu bee-moos. Bainhira persiza bee mak husu apoiu husi komunidade ne’ebé hela besik. Akontese ida ne’e la’ós agora, uluk kedan iha tempu autoridade anteriór, maibé agora agradese tanba bele fó ona solusaun. Horisehik SAS mai dada ona bee no agora utiliza ona iha postu saúde”, dehan.
Notísia relevante: Uma kain 200-resin iha Nitibe husu Governu konstrui perfurasaun bee-moos
Rekorde katak Postu Saúde Bitila konstrui iha tempu covid-19 iha 2021, funsiona hanesan kuarentena, ne’ebé ezekuta husi empreza Lorotias Unipesoál, Lda. ho montante osan rihun $109-resin ho nia médida 26×10, ne’ebé kompostu husi kuartu 11, hariis-fatin 13 no sala enkontru ida.
Kona-ba rezidénsia pesoál saúde nian ezekuta husi empreza Hunu Bahalaco Unipesoal, Lda. ho montante orsamentu $47.059.28.
Jornalista: Abílio Elo Nini
Editora: Maria Auxiliadora
