OÉ-CUSSE, 23 Agostu 2024 (TATOLI) – Ministériu Saúde (MS) hamutuk ho Servisu Saúde Rejiaun Administrativa Espesiál Oé-Cusse Ambeno (RAEOA) halo advokasia kona-ba Programa Malária hodi hasa’e koñesimentu komunidade iha suku Bene-Ufe, sub-rejiaun Nítibe.
Diretora-Jerál Kuidadu Saúde Primária, Elisabet Leto Mau, hateten objetivu husi atividade ne’e atu partilla ba komunidade no seguransa sira iha fronteira kona-ba moras malária no moras hada’et sira, nune’e bele prevene aan tanba daudaun Timor-Leste prepara atu deklara ba mundu katak livre husi moras ida ne’e.
“Objetivu husi advokasia ne’e atu habelar informasaun kona-ba Programa Malária ba komunidade, xefe suku no seguransa no pesoál saúde sira, nune’e haforsa serbisu iha baze, tanba ita-nia nasaun agora prepara atu simu sertifikadu livre husi malária husi WHO”, Elisabet Mau dehan iha aldeia Bitila, suku Bene-Ufe.
Notísia relevante: Prevene moras hada’et, MS halo advokasia iha fronteira Sakato
Tanba ne’e mak, Ministériu Saúde liuhusi Programa Malária tuun bá terrenu, liuliu ba iha área fronteira atu partilla informasaun, nune’e evita ema hodi importa moras ne’e mai Timor-Leste, tanba Oé-Cusse, Bobonaro no Covalima besik fronteira no persiza hasa’e komunidade nia konxiénsia.
“Tanba dalaruma relasaun kultura, família, barak hela iha rai sorin no movimentu tama no sai, entaun Ministériu Saúde tenke habelar informasaun liuhusi advokasia hodi prevene moras malária”, katak.
Notísia relevante: MLTL formaliza akordu ho RAEOA hodi kombate moras lepra
Iha biban ne’e, Sekretáriu Rejionál ba Asuntu Saúde, Luís de Jesus Neno, enkoraja komunidade atu hatutan informasaun ba família, ba ema iha bairru, nune’e hamutuk prevene malária iha nivel suku.
“Ita persiza kuidadu aan husi moras hada’et sira, nune’e labele hetan impaktu. Tanba ne’e, atu moras labele da’et mai ita, persiza prevene aan. Liuhusi advokasia ne’e, ha’u husu kontinua habelar informasaun ba ita-nia komunidade atu hatene kle’an saida mak ita tenke halo atu moras ne’e labele mosu fali”, nia salienta.
Batista da Cunha, nu’udar partisipante husi suku Bene-Ufe agradese ba MS tanba bele hasa’e konxiénsia komunidade nian, liuliu iha fronteira atu prevene aan husi moras malária no moras hada’et sira.
“Ne’e importante tebes, tanba ita haree movimentu komunidade iha fronteira, tanba relasaun kultura, dalaruma sira sorin mai ita, ita-nia mós bele sai, entaun liuhusi advokasia ne’e bele hasa’e ami-nia konxiénsia atu tau atensaun ba programa ne’e”, nia realsa.
Notísia relevante: Tempu udan, husu kada uma-kain limpeza hodi evita moras dengue
Advokasia kona-ba Programa Malária ne’e, Ministériu Saúde hamutuk ho Sekretaria Rejionál ba Asuntu Saúde RAEOA partilla ona informasaun ba populasaun sira iha liña fronteira sira, hahú uluk iha Sakato, Pássabe, Oésilo, ikus iha fronteira sub-rejiaun Nítibe.
Jornalista: Abílio Elo Nini
Editora: Maria Auxiliadora
