OÉ-CUSSE, 16 jullu 2024 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Rogério Tiago Lobato, selebra akordu ho Diretora-Ezekutiva Misaun Lepra Timor-Leste (MLTL), Afliana Lisnahan dos Reis, hodi reforsa Servisu Saúde, liuliu kombate moras lepra iha Oé-Cusse.
“Selebrasaun akordu ne’e atu kombate moras lepra iha Oé-Cusse, tanba insidénsia iha Oé-Cusse aas tebes, entaun Misaun Lepra mai iha Oé-Cusse atu fó apoiu ho sira-nia koñesimentu no matenek hodi hamutuk halo esforsu ida bele sai efetivu no efisiénsia atu kombate moras lepra ne’e”, Rogério Lobato ko’alia iha ámbitu asinatura akordu ne’ebé hala’o iha nia gabinete.
Iha sorin seluk, Diretóra-Ezekutiva MLTL, Afliana Lisnahan dos Reis, promete sei koopera ho Servisu Saúde Oé-Cusse atu reforsa kontrolu ba tranzmisaun moras lepra ne’e.
“Objetivu husi asina MoU ne’e ba programa hapara tranzmisaun moras lepra iha Oé-Cusse. Serbisu ba tinan lima atu hatún taxa prevalénsia moras lepra”, nia dehan.
Notísia relevante: AEAL: Moras Lepra aas iha Baucau-Dili-Manatuto-RAEOA
Diretora ne’e informa katak MLTL rejista dezde 2022 kazu ema ho moras lepra iha territóriu hamutuk 150 no iha Oé-Cusse to’o iha trismestre daruak rejista ona ema na’in-16.
“Ho MoU ne’e ami sei esforsa atu hapara totál tranzmisaun moras lepra liuhusi serbisu integradu. Ida-ne’e Misaun Lepra uza sai hanesan oportunidade ba serbisu moras lepra nian ho kbiit tomak atu apoia Servisu Saúde Oé-Cusse”, nia kompromete.
Notísia relevante: RAEOA koordena TTU-Kupang halo promosaun integrada ba moras hada’et
Tuir dadus Serbisu Saúde Oé-Cusse, daudaun ne’e rejista pasiente moras lepra hamutuk na’in-16, husi númeru ne’e iha sub-rejiaun Pante Makasar na’in-sia, sub-rejiaun Oésilo ida, Pássabe ida no Nítibe lima.
Jornalista: Abílio Elo Nini
Editora: Maria Auxiliadora
