OEKUSI, 02 Outubru 2025 (TATOLI) – Autoridade Rejiaun Administrativa Espsiál Oekusi Ambeno (RAEOA) lideradu Prezidente Autoridade, Régio da Crus Salu, aloka verba rihun $85,881.83 husi Orsamentu Jerál Estadu (OJE) 2025 nian hodi harii postu saúde ida iha aldeia Lamasi foho suku Bene-Ufe sub-rejiaun Nítibe Rejiaun Administrativa Espesiál Oekusi Ambeno (RAEOA).
Diretora Diresaun Rejionál Serbisu Saúde Oekusi, Merita Lafo Caunan, informa, alokasaun verba ne’e liuhusi prosesu konkursu públiku, tanba Lamasi koñesidu nu’udar fatin izoladu ida iha sub-rejiaun Nítibe, tan ne’e presiza tau matan hodi hakbesik fasilidade saúde ba komunidade sira iha área rurál.
Notísia relevante:Autoridade RAEOA lansa programa atendimentu saúde iha fatin izoladu 11
Autoridade ne’e hateten, daudaun ne’e rezultadu konkursu anúnsia ona ba públiku, iha tempu-badak Autoridade RAEOA sei selebra akordu kontratu definitivu ho empreza hodi hahú konstrusaun.
“Pedidu atu harii postu saúde iha Lamasi mai husi saúde, tanba ne’e importante atu hakbesik fasilidade saúde ba komunidade sira, tanba Lamasi konsidera fatin izoladu liu hamutuk ho bairru Biele, atu fasilita komunidade sira asesu ba tratamentu besik,” Merita Lafo ba jornalista sira iha Lifau Oekusi, ohin.
Ezekutiva ne’e informa, daudaun ne’e postu saúde ida ejiste hela iha Citrana área suku Bene-Ufe, maibé komunidade ladun barak atu asesu, sira husi Lamasin foho tuun mai ho distánsia do’ok, entaun ho konstrusaun ne’e, sei muda fali ba Lamasi, tanba maioria komunidade barak mak hela iha Lamasi foho.
“Maibé la’ós postu saúde Citrana la ativu ona, foin lalais ami mós hetan ajuda ida mai husi kongregasaun madre SSPS, halo ona levantamentu ba postu saúde referidu, entaun iha tempu-badak ita sei hetan ajuda mós husi kongregasaun ne’e, atu apoia hodi fó atendimentu ho klínika ba komunidade sira iha Citrana,” nia hateten.
Notísia relevante:PM Xanana atribui prioridade neen ba PA RAEOA ezekuta durante fulan tolu
Jestór sub-rejiaun Nítibe, Agustinho Afulit, agradese tanba antes ne’e, komunidade sira iha aldeia Lamasi, mak rekomenda direta ba Primeiru-Ministru, Kay Rala Xanana Gusmão, iha ámbitu vizita diálogu iha aldeia Lamasin.
“Ha’u lori komunidade sira-nia agradese ba Governu, tanba uluk abitante sira iha Lamasin mak rekomenda direita iha vizita Avo Nana, ne’ebé horsehik ha’u akompaña, anúnsia ona rezultadu tenderizaun (konkursu), entaun espera tempu-badak bele hahú kontrusaun ona, tanba durante ne’e, komunidade atu halo tratamentu, tenke la’o loron ida tomak mai iha sentru saúde Baoknana no balun ba Citrana, maibé tenke ba dadersan lorokraik mak fila tanba do’ok,” nia orgullu.
Notísia relevante:Rogério Lobato sei komunika IGEADI,I.P atu loke estrada ba abitante Biele
Entretantu, tuir dokumentu ne’ebé Ajénsia Tatoli,I.P asesu iha Diresaun Rejionál Planeamentu no Aprovizionamentu liuhusi Unidade Aprovizionamentu no Jestaun Kontratu (USAGC), fó sai rezultadu konkursu públiku ho númeru 075/USAGC/SRF/RAEOA-TL/VI/2025 katak Deskrisaun projetu Konstrusaun postu saúde Lamasi sei ezekuta husi empreza Jmelo Unipesoál Lda ho valór orsamentu rihun $$85,881.83.
Iha dokumentu públikasaun rezultadu konkursu ne’e, bazeia ba dekretu-lei númeru 22/2022 Rejime Jurídiku Aprovizionamentu (RSA) prevista iha artigu 176.o, hodi fó biban ba empreza konkorente sira-ne’ebé la satisfas ho rezultadu referidu, bele hato’o reklamasaun ho durasaun tempu loron lima nia laran, hahú husi data públikasaun husi 30 Setembru to’o 04 Outubru 2025.
Jornalista: Abílio Elo Nini
Editór: Rafael Ximenes de A. Belo
