Autoridade prepara rihun $100 utiliza ba komemorasaun 28 Novembru iha Pássabe
OEKUSI, 04 Novembru 2026 (TATOLI) – Autoridade Rejiaun Administrativa Espesiál Oekusi Ambeno (RAEOA), prepara ona verba rihun $100, aloka husi Orsamentu Jerál Estadu (OJE) 2026 nian, hodi utiliza ba komemorasaun loron Proklamasaun Independénsia 28 Novembru ba dala-51 ne’ebé sei realiza iha suku Abani sub-rejiaun Pássabe.
Prezidente Autoridade RAEOA, Régio da Cruz Salu, informa, husi fundu rihun $100 ne’e, Autoridade aloka uluk ona rihun $38 ba Diresaun Servisu Rejionál Administrasaun, hodi prepara fatin seremónia, dezlokasaun materiál sira husi Institutu Jestaun Ekipamentu (IGE), iluminasaun no hadi’a saneamentu públiku sira.
“Foin daudaun ha’u aprova ona rihun $38 ba servisu administrasaun atu haree fatin ba isar bandeira no preparasaun seluktan, hanesan IGE atu ba hamoos fatin inklui servisu SAS, maibé osan ne’e seidauk iha aprovasaun finál, tanba proposta ha’u ladun haree nia númeru loloos ba utilizasaun orsamentu ba kada setór, ha’u bele hateten katak rihun $100, ne’e inklui layout atu aterru kampu ba seremónia, feira no reabilitasaun ba fasilidade públiku sira,” nia hateten ba jornalista sira iha Oekusi, foin lalais ne’e.
Notísia relevante:Autoridade RAEOA deside komemora loron Proklamasaun 28 Novembru iha Pássabe
Nia afirma, verba ne’e mós inklui ona ho ajudikasaun direita ba setór privadu (kompañia) ida, hodi kompleta halo iluminasaun ahi street-ligth ba suku Malelat to’o Pássabe suku Abani, nune’e iha komemorasaun labele afeta ba públiku.
Tanba, nia dehan, iha komemorasaun loron Proklamasaun Independénsia 28 Novembru tinan ne’e, Autoridade RAEOA sei konvida Autoridade husi Distritu Timur Tengah Utara (TTU), no Kupang, atu partisipa iha komemorasaun ne’e.
Notísia relevante:Komemorasaun 28 Novembru fanu timoroan sira-nia espíritu no konxiénsia
Jestór Sub-rejiaun Pássabe, Paulino Marques akresenta katak daudaun, autoridade lokál iha Pássabe prepara ona fatin, sei realiza iha kampu futeból Pássabe.
“Ami simu ona ekipa husi komisaun organizadora, fatin ita prepara ona iha kampu ne’e, depois kona-ba feira, komisaun mak sei deside, tanba sei iha ós jogu tradisionál hanesan kuda halai taru, Pássabe hanesan uma-na’in, entaun komunidade sira iha informa ona liuhusi aviza iha misa igreja tanba iha Pássabe suku rua Malelat ho Abani,” nia hateten.
Notísia relevante: Gregório Saldanha: 28 Novembru nu’udar loron embriaun ba luta ukun rasik aan
Jornalista: Abílio Elo Nini
Editór: Rafael Ximenes de A. Belo
