Autoridade RAEOA deside komemora loron Proklamasaun 28 Novembru iha Pássabe
OEKUSI, 17 Setembru 2026 (TATOLI) – Timor-Leste sei komemora Loron Proklamasaun Independénsia Unilaterál 28 Novembru 1975 – 28 Novembru 2026 ba dala-51. Selebrasaun ne’e nu’udar momentu reflesaun ba timoroan hotu atu hateke ba oin hodi kontribui liután ba dezenvolvimentu país.
Tanba ne’e, Autoridade Rejiaun Administrativa Espesiál Oekusi Ambeno (RAEOA), lideradu husi Prezidente Autoridade Régio da Cruz Salu, deside liuhusi reuniaun katak komemorasaun Loron Proklamasaun Unilaterálmente 28 Novembru 2026 sei selebra iha suku Abani, sub-rejiaun Pássabe.
“Tuir kompeténsia, Autoridade RAEOA delibera desizaun ida atu tinan ne’e konsentra, lori sai komemorasaun 28 Novembru tinan ne’e ita hahú iha sub-rejiaun Pássabe. Tanba komemorasaun loron istóriku sira-ne’e atu komemora povu nia susesu, ne’e maka sentidu komemorasaun sira-ne’e besikliu ba povu iha suku no aldeia,” hateten Régio da Cruz Salu ba jornalista sira iha Oekusi.
Pássabe poténsia nu’udar zona agro-turizmu
Nia esplika katak razaun prinsipál ba realizasaun loron istóriku ne’e iha Pássabe mak tanba polítika Autoridade ba futuru nian, iha ne’ebé sub-rejiaun Pássabe sei sai projetu prioridade ida atu dezenvolve nu’udar sentru agro-turizmu iha Pássabe-plús, inklui mós sub-rejiaun Oésilo, tanba área Pássabe rasik iha poténsiu nu’udar zona agro-turizmu.
“Maibé importante seluk atu advokásia hanorin povu sentidu kona-ba 28 Novembru nu’udar loron istóriku Timor-Leste nian. Tinan-tinan ita konsentra de’it iha vila laran, povu iha baze la senti loron ne’e,” nia afirma.
Entretantu, kona-ba alokasaun finansiamentu ba loron istóriku ne’e, Autoridade RAEOA sei kontinua diskute, tanba iha mós planu atu promove produtu lokál komunidade sira-nian liuhusi feira bazar kalan.
“Ita la’ós selebra de’it, maibé promove mós progresu no kreatividade povu nian. Semana ida tomak antes to’o 28 Novembru sei iha atividade expo ka feira, atu hatudu sira-nia produtu orijinál no kreatividade seluk,” nia hateten.
Iha sorin seluk, Jestór Sub-rejiaun Pássabe, Paulino Marques, hateten katak kona-ba preparasaun, dadaun ne’e sira koordena ona ho entidade relevante sira hanesan edukasaun, igreja, no lian-na’in sira atu halo preparasaun másimu hodi garante komemorasaun Loron Proklamasaun ne’e la’o ho susesu.
“Kona-ba fatin, ita indika ona. Ita mós koordena ho parte hotu atu prepara halo limpeza no atividade sira seluk tan, tanba tinan ne’e komunidade suku rua iha sub-rejiaun Pássabe maka sai uma-nain, entaun tenki iha preparasaun másimu,” nia hateten.
Jornalista: Abílio Elo Nini
Editór: Rafael Ximenes de A. Belo
