COVALIMA, 28 Novembru 2024 (TATOLI) – Inspetór ba serimónia isár bandeira iha Loron Proklamasaun Independénsia Timor Leste ba da-49, iha Covalima, Ministru Komérsiu no Indústria, Filipus Nino Perreira, hateten selebrasaun data ne’e hafanun timoroan hotu ho espíritu no konxiénsia foun, nune’e bele promove pás no unidade iha país.
“Atu promove pás la’ós iha ibun-tutun de’it, maibé importante ita tau iha prátika, kontribuisaun reál husi parte hotu mak presiza loke aan hodi lori Timór ba mundu. Presiza ambiente pás mak sai hanesan kestaun prinsipál ida”, nia realsa iha kampu Ladi, ohin.
Governante ne’e dehan Prezidente Repúblika, José Ramos Horta, nia mensajen iha komemorasaun lorone ne’e klaru, tanba Timór país ki’ik no presiza promove pás, simu malu internál entre maun no alin, hodi lori nasaun ba próspera.
Tanba ne’e, presiza konstribui ba dezenvolvimentu ho foku ba infraestrutura bázika hanesan bee, saneamentu, edukasaun, saúde no agrikultura no ida-ne’e programa prioridade Governu nian.
“Atu halo dezenvolvimentu presiza iha nafatin espíritu serbisu hamutuk, envolve parte hotu, importante mak sidadaun hotu nia partisipasaun no vontade”, nia dehan.
Ministru salienta katak iha komemorasaun loron nasionál presiza partisipasaun komunidade no autoridade munisipál sira-nia nia prezensa hodi halo reflesaun.
“Ita hotu halo reflesaun ba jornada pasada, nune’e mós serbisu hamutuk hodi fo liman ba malu lori rai ida-ne’e ba oin. Ha’u hanoin ita reflete fali mensajen Prezidente Repúblika José Ramos Horta nakonu ho espíritu pás, rekonsiliasaun, sai hanesan asuntu prinsipál ba Estadu, presiza kontribuisaun máxima husi sidadaun hotu”, governante ne’e afirma.
Iha fatin hanesan, Prezidente Autoridade Covalima, Miguel Armanda Cardoso, hateten Timor-Leste proklama ona nia independénsia ba da-49 ne’ebé daudaun ne’e dezenvolvimentu la’o, maibe presiza atu hadi’a ba oin.
Komandante PNTL Covalima, Superintendente Polísia Calisto Gonzaga, mós salienta katak iha komemorasaun ida-ne’e mesajen Prezidente nia bolu ema atu kria lasu amizade ho sidadaun sira iha Timór no iha rai viziñu.
“Komemora 28 Novembru, konvite ba veteranu husi Indonézia ne’e hatudu istória, maibé ita presiza iha lasu amizade hanesan parte F-FDTL no PNTL oinsá kria seguransa ida di’ak iha fronteira. Ita Estadu ketak presiza lasu amizade”, nia reitera.
Komandante ne’e espera katak Timor-Leste bainhira sai membru ASEAN haree ba setór seguransa ne’e importante. “Ita-nia rai-laran iha konflitu hela de’it, haree malu matan la moos, sidadaun iha Indonézia, ha’u hanoin labele simu ita. Tanba atu sai membru ASEAN parte seguransa no defeza no ekonomia mak bele konstrui Estadu ho di’ak”, nia afirma.
Iha selebrasaun data ne’e, Komandu PNTL Covalima koloka forsa seguransa hamutuk 140-resin hodi garante serimónia ne’e la’o iha ambiente pás.
“Garante seguransa iha serimónia komemorasaun independénsia, ita husu apoiu seguransa unidade sira husi Batallaun Orden Públika, Polísia Unidade Patrullamentu Fronteira (UPF), Unidade Polísia Máritima (UPM), seguransa sivíl no F-FDTL”, Calisto Gonzaga relata.
Tuir komandante ne’e, seguransa iha loron ne’e importante no sei kontinua hametin to’o selebrasaun loron boot natál no tinan foun.
Notísia relevante: 28 Novembru, tempu ba ukun-na’in no sidadaun hotu halo reflesaun – Padre Lúcio
Jornalista: Celestina Teles
Editora: Maria Auxiliadora
