OÉ-CUSSE, 27 Novembru 2024 (TATOLI) – Iha misa agradesimentu ba Loron Proklamasaun Independénsia Timor-Leste ba da-49, ne’ebé realiza iha Igreja São Minguel Arcanjo Padiae, Oé-Cusse, Vigáriu-Jerál Dioseze Maliana, Lúcio Norberto de Deus, ne’ebé prezide misa apela ba ukun-na’in no sidadaun hotu atu halo reflesaun iha loron ne’e.
“Atu moris di’ak mak liuhusi respeitu no konsidera malu, maibé realidade moris mundu ne’e, ohin loron iha ema balun mak moris ho ksolok, maibé iha mós balun moris sei terus hela tanba funu, tanba dezastre naturál, tanba injustisa, violénsia, tanba ki’ak no mukit no seluktan. Ida-ne’e reflesaun boot ba ita nu’udar timoroan”, saserdote ne’e dehan iha nia omília.
Timor-Leste selebra tinan 49 ba Loron Proklamasaun Independénsia no iha ema lubun mak mate hahú husi Nicolau Lobato, Francisco Xavier, no sira seluk. “Hein katak ita sira sei moris halo netik buat ruma ba rai ne’e. Se ita hakarak fahe períodu ida-ne’e ba rua, tinan 25 hahú husi 1975 mai to’o 1999, tempu ba luta nian, iha momentu ne’ebá timoroan hotu hatudu kooperasaun mútua, rona malu, respeita malu tebes”, vigáriu-jerál ne’e dehan.
Tuir nia, períodu husi 20 Meiu 2002 nu’udar independénsia loloos nian. “Pergunta mak ita halo ona ho ema sira-ne’ebé halo iha 1975? Ema lubun mate iha ai-laran, ita hala’o ona di’ak ba rai ne’e hodi hanoin ba povu ne’e nia moris? Maibé realidade ohin loron unidade komesa naksobu, erói sira triste tebes ho atitude sira-ne’e, tanba falta respeita malu”.
Tanba ne’e, amu Lúcio husu ba ukun na’in-sira atu tempu agora ne’e ba halo reflesaun. “Se ita hakarak povu ne’e sai di’ak, tinan ne’e ita selebra 28 Novembru iha Oé-Cusse, iha fatin istóriku, ida ne’ebé kultura foun tama mai hodi hakuak kultura povu nian mak fé katólika. Tanba ne’e, husu ita hotu halo reflesaun saida mak ita halo ona iha períodu independénsia hahú husi 20 Maiu 2002 to’o agora”, nia dehan.
Iha biban ne’e, Ministru Interiór, Francisco da Costa Guterres, lori komisaun organizadora agradese ba igreja Katólika ne’ebé bele realiza misa hodi agradese ba Maromak, tanba ho tulun bele lori povu Timor-Leste alkansa mehi ba ukun rasik-aan.
“Liuhusi misa ne’e, reza ba ita-nia erói sira-ne’ebé uluk fó sira-nia vida ho aten-barani ba prosesu ukun rasik-aan ne’e. Tanba ne’e, ohin ita hotu mai misa hodi agradese ba sira [erói], ita reza para Maromak fó tulun atu hetan moris di’ak iha mundu seluk”, nia hato’o.
Depoizde misa remata, kontinua kedan ho atividade kari ai-funan, no iha momentu ne’e Vise-Primeiru-Ministru no Ministru Koordenadór Asuntu Ekonómiku no Ministru Turizmu no Ambiente, Francisco Kalbuadi Lay, agradese ba povu Oé-Cusse tanba ho entuzismu partisipa iha kari ai-funan ne’e.
“Atu fó hanoin hikas fali ita hotu katak matebian sira, erói sira ne’ebé fó ona sira-nia vida, isin no raan tomak hodi aban ita selebra Loron Proklamasaun Independénsia ba da-49 iha Oé-Cusse. Liuhusi serimónia agora, depois ita tau tiha ai-funan, sekuénsia ba programa sei barak. Tan ne’e agradese ba ita hotu, liuliu Oé-Cusse sira-nia partisipasaun dezde abertura feira husi primeiru-ministru to’o ohin kari ai-funan”, nia hato’o.
Governu deside komemora Loron Proklamasaun Independénsia 28 Novembru iha Rejiaun Administrativa Espesiál Oé-Cusse Ambeno. Tema prinsipál ba aniversáriu loron nasionál ne’e mak “Orgullu ba ita-nia identidade no kultura, ita harii futuru liberdade, justisa no esperansa ba ita-nia Povu”.
Notísia relevante: Selebra 28 Novembru: Dom Virgílio Kardeál husu timoroan kria dame-unidade
Jornalista: Abílio Elo Nini
Editora: Maria Auxiliadora
