DILI, 27 fevereiru 2024 (TATOLI)-Membru Parlamentu Nasionál (PN), liuhusi Deputadu CNRT, Saul Salvador, husu autoridade kompetente atu aplika sansaun todan (grave) ba sidadaun ne’ebé soe lixu arbiru.
Notísia Relevante: PN tenke aprova rejime jurídiku hafoin fó multa ba sidadaun ne’ebé soe lixu arbiru
Iha intervensaun, nia hakarak promove debate problema lixu ne’ebé Deputadu sira sempre aprezenta problema ne’e iha PN, nune’e nia konsidera problema lixu kualifika nu’udar problema nasionál no problema konsiénsia umana iha sosiedade.
Lixu iha kapitál Dili no munisípiu sira orijen hosi fatin rua hanesan iha família no lixu komersiál ne’ebé prodús hosi negosiante ambulante, loza, supermerkadu, merkadu tradisionál. Loza boot sira ho merkadu produs kuantidade lixu barak, maibé la fó responsável boot ba sira atu halo jestaun rasik oinsá lori rasik lixu ba soe iha lixeira.
“Ho soe lixu arbiru ninia impaktu mak afeta saúde públika no provoka inundasaun iha tempu udan. Konsiénsia sidadaun iha problema liuliu kona-ba sentidu pretense, responsabilidade no sensibilidade komun ba Timor-Leste, nune’e presiza halo reflesaun. Primeiru, fó sansaun grave ba ema-ne’ebé soe foer arbiru iha fatin proividu. Daruak, reflete kontrolu podér lokál kona-ba laiha konsiénsia, komunidade soe lixu arbiru iha sidade laran,” nia hateten liuhosi reuniaun plenária PN, tersa ne’e.
Datoluk, promove atensaun empreza sira hanesan kompañia CALTEC no sira seluk ne’ebé promove resiklazen modifika lixu ba produtu ba ema seluk bele utiliza.
Dahaat, presiza envolve komunidade hotu, funsionáriu públiku no parte hotu, ho ajente militár iha instuisaun defeza no seguransa atu halo atividade limpeza jerál.
Aleinde foku prioriza planu ordenamentu territóriu sidade Dili hodi ordena kapitál ho didi’ak atu bele prevene inundasaun ne’ebé sempre akontese iha tempu udan.
Nune’e, nia husu IX Governu Konstitusional atu rezolve pontu sira no ba Ministériu Administrasaun Estatál (MAE) atu kombate asuntu ne’e ho forma sériu.
Deputadu FRETILIN, David Dias Ximenes ‘Mandati’, mós konsidera problema lixu iha kapitál Dili sai preokupasaun boot ohin loron nune’e presiza iha jestaun lixu iha Dili.
Prezidente komisaun E trata asuntu infraestura, Deputadu Marcos Xavier, hateten hein katak ekipamentu modernu atu trata lixu ne’ebé Ministériu Administrasaun Estatál (MAE) ne’e sei fasilita liután autoridade nia serbisu hodi rezolve problema lixu iha Dili.
Nia mós nafatin husu, sidadaun hotu atu iha konsiénsia labele soe lixu arbiru tanba impaktu hosi lixu ne’e bele hamosu inundasaun iha fatin-fatin bainhiraudan monus rai.
Vise Ministru ba asuntu Parlamentár, Adérito Hugo da Costa, hateten kona-ba jestaun lixu atuál Governu liuhosi Ministériu Administrasaun Estatál (MAE) iha hela progresu implementasaun jestaun foun kuidadu lixu iha kapitál Dili ho akizisaun ekipamentu aas ho oioin hodi implementa iha sidade laran, no agora iha prosesu kontratu setór privadu pretende partisipa projetu manutensaun no jestaun lixu.
Notísia Relevante: Governu sei fó sansaun ba ema-karreta ne’ebé soe lixu arbiru
Jornalista : Nelson de Sousa
Editór : Cancio Ximenes
