COVALIMA, 27 fevereiru 2024 (TATOLI) – Saúde munisípiu Covalima seidauk rejista moras dengue, tanba ne’e Diretora Nasionál Edukasaun no Promosaun Saúde, Emília Mendonça, husu ba abitante sira atu kuidadu ambiente moos hodi prevene husi moras ne’e.
“Agora, tempu udan monu rai, tenke hamoos ambiente, tanba susuk ne’ebé mak tata ita iha tempu loron lori moras dengue, susuk ne’e mai husi bidón no roda ne’ebé ita rai hodi tau bee ruma, kalén aat, plástiku sira no seluk tan”, Emília Mendonça apela iha postu Fatumea, ohin.
Nia salienta katak Ministériu Saúde daudaun rejista moras dengue aas iha Manatuto hamutuk 77, maske Covalima seidauk iha kazu maibé ministériu kontinua fahe informasaun, nune’e komunidade sira labele hetan moras ne’e.
Responsavel ne’e esplika katak moras dengue hanesan moras kustupadu ne’ebé hadaet husi susuk Aedes ne’ebé infetadu ona ho vírus dengue nian. Atu prevene moras ne’e tenke kose replente durante tempu loron, uza aerosol susuk, toba iha moskiteiru laran maske iha tempu loron, uza rede ba janela no odamatan nune’e prevene susuk tama uma no hatais kalsa no faru lima naruk.
Reprezentante Diretór Servisu Saúde munisípiu Covalima, Agapito de Jesus, hatete sira iha planu atu halo promosaun saúde ba komunidade iha infraestrutura saúde iha postu to’o suku sira, ne’ebé kria ona oráriu nune’e pesoál sira hala’o atividade promosaun ligada ba prevensaun moras dengue iha ámbitu hala’o programa Servisu Integradu Saúde Komunitária (SISCA) no klínika movel.
Aleinde atu prevene moras dengue pesoál sira la’ós fahe de’it informasaun, maibé iha fulan kotuk halo ona advokasia ba joven sira liuhusi igreja, autoridade no grupu hotu hodi fó hanoin nafatin oinsá bele prevene moras dengue, malária no seluk tan.
“Pesoál saúde sira kria ona oráriu atu promove informasaun depende halo konsulta ba komunidade iha sentru saúde no postu saúde sira, tanba populasaun barak liu halo konsulta iha loron segunda no tersa, nune’e bainhira pesoál saúde rejista moras dengue halo kedan intervensaun hodi distribui abate atu tau ba bee hodi hamate susuk iha bee laran no halo fumigasaun hodi oho susuk iha uma laran”, esplika.
Notísia relevante: MS rejista pasiente na’in-rua mate ho moras dengue iha fevereiru ne’e
Jornalista: Celestina Teles
Editora: Maria Auxiliadora
