DILI, 28 fevereiru 2024 (TATOLI)—Bankada Governu liuhosi Vise bankada CNRT no hanesan mós Prezidente Komisaun A trata asuntu Justisa no Konstituisionál iha Parlamentu Nasionál (PN), Deputadu Patrocínio dos Reis Fernandes, hateten seidauk iha hanoin atu altera artigu tolu iha lei indultu.
Artigu hirak ne’ebé Tribunal Rekursu deklara inkonstitusionál mak ahanesan atu altera artigu 6, artigu 7 alínea 1, 4 no 5 ho artigu 9 hosi lei númeru 20/2023, Lei Konsensaun Indultu no Komutasaun Pena.
Notísia Relevante: TR deklara inkonstitusionalidade ba alterasaun Lei Indultu no Komutasaun Pena, PPN: La’ós lei hotu
“Seidauk iha hanoin. Ami haree katak iha lei barak presiza atu halo no iha serbisu barak presiza atu halo, ne’ebé la presiza serbisu konsentra de’it ba lei ida kona-ba indultu. Lei ne’e entra em vigór hela, menus artigu tolu ne’ebé Tribunál deklara inkonstituisionalidade labele aplika,” Prezidente komisaun A ne’e hateten ba jornalista iha PN, kuarta ne’e.
Hanesan iha debate jeneralidade ba lei ne’e, nia hateten, mezmu lei indultu laiha tuir konstituisaun Prezidente Repúblika iha kompeténsia nafatin.
Tuir nia, kualkér lei inisiativa ne’e mai hosi Deputadu sira, hafoin atu revoga ka la revoga ne’e tenke mínimu um quinto Deputadu mak subskreve hodi bele aprezenta nu’udar inisiativa ida, maibé atu revoga ka altera ou la altera tenke inisiativa mai hosi Deputadu sira.
Jornalista : Nelson de Sousa
Editór : Cancio Ximenes
