DILI, 28 fevereiru 2024 (TATOLI)—Diretora Ezekutiva Forum Komunikasaun ba Feto Timor-Leste (FOKUPERS), Maria Fatima Perreira Guterres, husu ba adolexente sira ne’ebé mak vítima ba Violénsia Bazeia ba Jenéru (GBV) atu tama filafali ba eskola.
“Hahú husi tinan 2023 FOKUPERS identifika katak vítima adolexente liu 60 husi violénsia bazeia ba jéneru ne’ebé hetan iha Munisípiu Dili, Ermera, Bobonaro no Viqueque, sira lakohi ba eskola tanba isin-rua sedu. Tanba ne’e, ami enkoraja no motiva sira atu tama fali ba eskola hodi asegura sira-nia mehi iha futuru,” Maria Fatima Perreira Guterres, hateten ba TATOLI iha City8, foin lalais ne’e.
Ezekutiva ne’e dehan, atu fó-hatene katak feto adolexente na’in 60 ne’e hela iha uma-mahon atu proteje sira no sira-nia oan, enkuantu FOKUPERS mós fó konsellu no motivasaun ba sira atu tama fali eskola.
“Ami servisu hamutuk ho Ministériu Edukasaun hodi simu sira no tama fali sira-nia eskola hodi bele hala’o sira-nia mehi iha futuru,” nia afirma.
Aleinde ne’e, kuaze labarik-feto isin-rua hotu ho idade entre tinan 14 no 17 sein la’en, FOKUPERS iha uma protesaun (Uma-mahon) atu evita problema ruma, atu nune’e sira bele hakmatek hodi rezolve sira-nia problema.
“Bainhira sira sai isin-rua sedu no la iha la’en, sira-nia inan-aman hirus tebes ba sira, tan ne’e ami hamutuk ho sira iha uma-laran atu hasees an husi problema sira, la’ós de’it katak FOKUPERS hakarak motiva sira liuhusi fó konsellu no fó hanoin sira atu fila fali ba eskola hodi buka-tuir sira-nia futuru ba aban bainrua nian,”nia hateten.
Iha fatin hanesan, Reprezentante Asisténsia Fundu Populasaun Nasaun Unidas nian (UNFPA, Domingas Bernando, dehan katak UNFPA servisu hamutuk ho Ministériu Edukasaun no FOKUPERS hodi implementa iha eskola edukasaun seksuál ne’ebé komprensivu (Boys and Children Circle) hodi promove atitude hanesan jéneru, podér igualdade boot liu, iha relasaun intimu no hamenus insidénsia VBJ.
“Ita sei kontinua servisu hamutuk ho Ministériu Edukasaun no Organizasaun Lokál Naun-Governamental inklui FOKUPERS hodi investe liután iha prevensaun no resposta ba VBJ iha Timor-Leste,” nia konklui.
Notísia relevante:UNFPA-MS lansa Uma Seguru SSK Liquiça hodi fasilita kliente VBJ
Jornalista: Felicidade Ximenes
Editór: Rafael Ximenes de A. Belo
