DILI, 28 fevereiru 2024 (TATOLI)–Governu liuhosi reuniaun Konsellu Ministru (KM), kuarta ne’e, delibera atu autoriza despeza to’o montante millaun $12 hodi gasta ba vizita Santo Papa Francisco, iha tinan ne’e.
“Montante ne’e Governu foti hosi Fundu Kontinjénsia ba Komisaun Altu Nível Institusionál ba vizita Sua Santidade Papa Francisco, hodi organiza atividade preparasaun ba vizita refere,” refere nota ne’ebé Agência Tatoli asesu, hafoin reuniaun ezekutivu, iha Palásiu Governu.
Notísia relevante : PM Xanana garante seguransa ba vizita Amu Papa Francisco mai Timor-Leste
Antes ne’e, Governu nomea ona Ministru Prezidénsia Konsellu Ministru, Agio Pereira, nu’udar Koordenadór Jerál ba vizita Santo Papa, enkuantu Ministru Administrasaun Estatál, Tomás do Rosário Cabral nu’udar Vise Koordenadór.
Governu simu ona vizita delegasaun hosi Vatikanu hodi koordena didi’ak kondisaun nesesáriu sira.
Aleinde ne’e, Koordenadór Jerál hamutuk ho ekipa daudaun halo ona preparasaun hamutuk ho delegasaun vatikanu iha loron hirak liubá hodi iharee fatin hotu-hotu ne’ebé Santu Padre sei vizita no realiza eventu.
Jornalista : Antónia Gusmão
Editora : Julia Chatarina
