DILI, 28 fevereiru 2024 (TATOLI)-Sekretáriu Estadu Terras no Propriadade, Jaimé Xavier, informa, IX Governu Konstitusionál kontinua mantein akordu tuir prinsípiu resiprosidade ba arrendmentu rai no uma Estadu ba Embaixada rezidente iha Timor-Leste.
Nia esplika, akordu tuir prinsípiu resiprosidade ba uma no rai Estadu ne’e katak kuandu nasaun ida mak hakarak loke sira-nia embaixada iha Timor-Leste, Governu Timor-Leste tenke atribui rai no uma Estadu ba nasaun refere hodi sira bele estabelese sira-nia embaixada.
Nune’e mós ba nasaun ne’ebé mak estabelese sira-nia embaixada hodi halo misaun diplomátiku tenke mós entrega uma no rai ba Governu Timor-Leste atu Governu bele estabelese embaixada.
“Ita sei kontinua selebra akordu prinsípiu resiprosidade ida ne’e ho Embaixada sira seluk ne’ebé agora daudaun iha ne’e. Nasaun Laos mós tuir planu atu loke nia embaixada iha Timor-Leste ita mós sei selebra akordu prinsípiu resiprosidade hanesan ho Laos. Sira ita fó rai no uma iha ne’e sira mós sei fó rai no ba ita iha sira-nia nasaun, para ita mós bele estabelese ita-nia Embaixada iha ne’ebá,” Jaime Xavier ba jornalista TATOLI iha nia kna’ar fatin, kuarta ne’e.
Governante ne’e hateten, prosesu ida ne’e iha hela diskusaun entre Governu rai rua. “Maibé ita sei haree sira (Laos) atu fó sira-nia rai medida hira para nune’e valór ita ho sira tenke ser hanesan,” nia adianta.
Entretantu, iha 2022 liuhosi Eis-ministru justisa, Tiago Amaral Sarmento, selebra akordu prinsípiu resiprosidade ba arrendamentu rai no uma Estadu ho Emabaixada Estadu Unidu Amérika (EUA) hodi fó biban ba Timor-Leste entrega rai ba Embaixada EUA hodi halo misaun diplomátika iha Timor-Leste. Nune’e mós ho akordu prinsípiu resiprosidade ida ne’e fó biban ba EUA entrega rai no uma ba Governu Timor-Leste iha EUA hodi TL mós bele estabelese embaixada iha ne’ebá.
Hafoin parte rua asina tiha akordu prinsípiu resiprosidade ba arrendamentu rai no uma Estadu, parte EUA entrega rai iha Nova Yorke ba Governu Timor-Leste atu estabelese Emabaixada Timor-Leste nian iha ne’ebá.
Notísia relevante:Governu inisia regula pagamentu ba arrendamentu imovel Estadu
Jornalista: Natalino Costa
Editór: Rafael Ximenes de A. Belo
