iklan

HEADLINE, KAPITÁL

MOP hakarak kontrola barrajen iha foho lolon hodi redús sedimentasaun

MOP hakarak kontrola barrajen iha foho lolon hodi redús sedimentasaun

Ministru Obras Públika, Samuel Marçal. Imajen Tatoli/Francisco Sony

DILI, 28 fevereiru 2024 (TATOLI)Governu liuhosi Ministériu Obra Públika (MOP) daudaun ne’e buka maneira oin-oin hodi redús sedimentasaun, nune’e bainhira tempu udan bele minimiza inundasaun iha kapitál Dili.

“Ita kontinua normaliza no hasai sedimentasaun iha kapitál Dili maibé sedimentasaun kontinua barak, entaun agora ita buka hela métodu ida hodi minimiza sedimentasaun, mak ita tenke halo check dam(barrajen) iha parte foho lolon sira, nune’e bele redús sedimentasaun,” Ministru Obra Públika, Samuel Marçal, informa, iha Palásiu Governu, kuarta ne’e.

Notísia relevante : Floresta alerta ba populasaun labele tesi ai iha fatin risku ba inundasaun

Parte tékniku MOP normaliza uluk atu bee bele halai tuir dalan, tanba daudaun tempu udan halo mota boot, labele halo asaun dahuluk, bainhira udan para maka bele haree fali barrajen.

“Dalan seluk ne’ebé ita presiza halo mak sei ko’alia ho Sekretaria Estadu Floresta (SEF) no Ministériu Turizmu Ambiente (MTA) hodi hahú fó atensaun ba komunidade ne’ebé hela iha foho leten hodi labele ke’e rai beibeik no estraga ai-horis, nune’e ita bele minimiza sedimentasaun iha tempu udan,” nia akresenta.

Antes ne’e, MOP kontratu ona empreza Dili United Unipessoal Lda hodi hamoos valeta sira iha kapitál Dili, maibé presiza tempu.

“Tanba durante tinan naruk ona nunka halo manutensaun ba valeta sira, entaun empreza serbisu la’ós ohin raut hotu kedas maibé book neineik haree uluk fatin sira ne’ebé intupidu, nune’e bee bele halai tuir nia dalan,” Ministru dehan.

MOP daudaun ne’e hahú ona hamoos no hadi’a valeta sira iha parte Ai-mutin, Delta I, Delta II no Manleuana no seluk tan.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!