iklan

COVALIMA, HEADLINE

PNTL Covalima halo apreensaun ba importasaun balada ilegál iha Tilomar

PNTL Covalima halo apreensaun ba importasaun balada ilegál iha Tilomar

Komandante PNTL Covalima, Superintendente Polísia Calisto Gonzaga. Imajen Tatoli/Celestina Teles.

COVALIMA, 28  fevereiru 2024 (TATOLI) – Komandu Polísia Nasionál Timor-Leste (PNTL) Covalima halo apreensaun ba fahi makau 25 ne’ebé sidadaun timoroan importa husi nasaun viziña Indonézia ho dalan ilegál, iha suku Maudemo, postu administrativu Tilomar, iha Covalima.

Komandante PNTL Covalima, Superintendente Polísia Calisto Gonzaga, relata katak apreensaun ne’e halo iha loron 26 pur volta 20h00 no kaptura mós sidadaun na’in-rua ne’ebé importa fahi refere liuhusi área tasi Uetaba iha suku Maudemo, tanba sira hatene katak importa liuhusi terrestre sei labele liu.

“Prosesu  importa fahi makau 25 ne’e sidadaun sira aluga karreta husi Betun [Indonézia] hafoin sira aluga tan ró hodi selu $60 hodi lori liuhusi tasi parte Uetaba, depois selu tan sidadaun sira kada ema $10 hodi lori fahi bá rai iha família nia uma mak Polísia kaptura sira”, komadante ne’e informa.

Nia salienta, tuir lolos kualkér sé de’it bele sosa fahi husi Indonezia hodi lori mai Timor-Leste, maibé tenke liuhusi dalan legál ka fronteira Mota-Masin no selu taxa hafoin bele lori sai.

Balada 25 no karreta Angguna ho xapa mátrikula A 22.458 asegura ona iha komandu hodi hein desizaun husi Ministériu Públiku, tanba edifísiu Polísia nian laiha kondisaun atu asegura fahi hirak ne’e.

Ba kestaun ne’e, jornalista tenta atu konfirma ho Xefe Departamentu Pekuária munisípiu Covalima kona-ba regra atu importa fahi husi Indonézia,  maibé laiha fatin tanba viajen bá iha postu Zumalai .

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!