DILI, 29 fevereiru 2024 (TATOLI)–Ministra Edukasaun (ME), Dulce de Jesus Soares, hateten, iha tinan 2024 ne’e IX Governu Konstitsionál liuhosi Ministériu Edukasaun (ME) la implementa ona programa bolsa méritu ba estudante mellór klasifikasaun iha eskola sira.
Notísia Relevante: BNCTL halo ona pagamentu ikus ba benefisiáriu bolsa méritu 1.600-resin
“Bolsa méritu ba estudante tinan ne’e laiha ona. Tanba ami mai implementa bolsa méritu ba 2023 nian de’it maibé tanba mudansa ba regra finansa, lei finansa nian tanba kuandu osan ne’e rai to’o 31 dezembru mak nia tenke fila ba kofre estadu,” Ministra Dulce hatete ba jornalista sira hafoin halo enkontru ho profesór ne’ebé halo agresaun fíziku hasoru estudante iha Eskola Ensinu Sekundáriu Tékniku Vokasionál (ESTV/STM) Becora iha salaun VIP, Vila Verde, kinta ne’e.
Tuir nia, ida-ne’e mós sai limitasaun ida katak ministériu edukasaun labele implementa programa bolsa méritu maibé ministériu edukasaun sei buka meiu hodi bele kontinua fali iha tinan oin mai.
“Futuru ita sei buka dalan haree maneira ruma hodi kontinua programa ida-ne’e,” nia dehan.
Tuir Education Management Information System (EMIS) iha tinan 2022, rejistu eskola privada no públiku hamutuk 1.437 ne’ebé kompostu hosi Ensinu Báziku 1.282, Ensinu Sekundáriu Jerál 102 no Ensinu Tékniku Vokasionál 53, ho totál populasaun ne’ebé sai benefisiáriu ba bolsa méritu hamutuk 1.437.
Ba programa ne’e, Ministériu Edukasaun Juventude no Desportu (MEJD) prevee orsamentu iha Orsamentu Jerál Estadu (OJE) 2022 hamutuk $7.537,499 no ba OJE 2023 Governu kontinua reforsa ho montante $3.475,000.
Reprezentante Ministériu Edukasaun, Joaquim Martins, hateten tuir relatóriu bolsa méritu tinan 2022 ne’e benefisiáriu hamutuk 9.170 ho nia orsamentu $5.127, 850.
Hosi totál orsamentu millaun $7.5-resin no miliaun $2.4-resin ne’e, ba programa bolsa méritu ne’e nia ezekusaun fahe ba etapa tolu mak etapa dahuluk ho benefisiáriu 5.853 ho nia montante $3.314,100, daruak ho benefisiáriu hamuruk 1.671 ho montante $923,550 no etapa ikus mak benefisiáriu hamutuk 1.646 ho montante $890.200.
Hosi orsamentu hirak ne’e, orsamentu restante ne’ebé la konsege ezekuta ne’e, tenke hatama fali ba kofre Estadu ne’e hamutuk $2.417.974,49.
“Agora ba tinan 2024 nian ita la prevee osan no sei tau planu iha 2025. Tanba presiza koordena ho jurídiku sira, nune’e implementa iha 2025 labele akontese fallansu. Husu ba benefisiáriu hotu-hotu katak ba sira-ne’ebé loke ona konta bankária mak osan seidauk tama, labele tauk tanba ami sei aloka osan,” nia dehan.
Jornalista : Osória Marques
Editór : Cancio Ximenes
