BOBONARO, 29 fevereiru 2024 (TATOLI)-Konsellu Kombatente Libertasaun Nasionál (CCLN, sigla portugés) munisípiu Bobonaro, iha loron sábadu (02/02) sei realiza atividade sertame ba estudante nível sekundáriu hodi komemora loron veteran 03 de marsu.
Sekretáriu Ezekutivu CCLN munisípiu Bobonaro, Moisés Ramos, hateten sertame ne’e sei foka ba istória libertasaun nasionál hahú tinan 1974 to’o 1999 no atividade ne’e sei organiza hosi komisaun organizadora liuhosi seksaun ida-ne’ebé dirije hosi Servisu Munisipál Edukasaun Bobonaro.
Nia esplika, sertame ne’e kona-bá istória ne’e hanesan espésie edukasaun sívika, tanba estudante sira ikus ne’e barak mak la kompriende istória luta libertasaun nasionál.
Notísia relevante: CMCLN Oé-Cusse ajenda atividade haat komemora loron veteranu
“Ita haree iha parte Edukasaun hanorin istória, maibé ita haree ne’e jerál de’it, mas detalla liu hanesan istória ne’ebé mak hahú hosi 1974 to’o 1999 laiha, tanba ne’e mak ami foti tópiku ne’e ho estatutu kombatente libertasaun nasionál nian, atubele kompriende no hatene hodi halo tuir,” nia ko’alia iha Maliana, kinta ne’e
Nia dehan, loron veteranus ne’e sei komemora ho atvidade misa agardesimentu ne’ebé realiza iha igjrea parókia Santa Cruz Maliana, hafoin ba tau ai-funan iha Osoáriu, suku Odomau.
Alende ne’e iha domingu (03/03) ne’e sei realiza serimónia solene hasa’e Bandeira Nasionál ne’ebé sei realiza iha Kampu Futeból Maliana.
“Ami hasai konvite ba ita-nia rezisténsia sira iha postu administrativu neen, mai partisipa hotu iha munisípiu ho sekretáriu zona,” nia katak.
Enkuantu daudaun ne’e ekipa Komandu Polísia Munisípiu Bobonaro, Batallaun Orden Públika, Kompañia Delta Soso Maliana no FALINTIL-Forsa Defeza Timor-Leste (F-FDTL) destakamentu postu Tunubibi, halo hela treinamentu parada iha kampu futeból Maliana, hodi prepara ba selebrasaun loron istóriku ne’e.
Notísia relevante: Konsellu Veteranu Bobonaro husu komunidade nafatin selebra loron veteranu
Jornalista: Sérgio da Cruz
Editór: Evaristo Soares Martins
