VIQUEQUE, 29 fevereiru 2024 (TATOLI)- Koordenadór Estensionista postu Uatulari, Francisco Tilman Belo, informa, Ministériu Agrikultura Pekuária Peska no Floresta (MAPPF), destaka ona ekipamentu pezadu hodi normaliza irrigasaun ka loke bee dalan ba natar sira iha Paetun, iha suku Matahoi, postu Uatulari, munisípiu Viqueque.
“Daudaun ekipamentu pezadu destaka ona iha beasa paetun nian hodi loke bee dalan ba natar sira ne’ebé antes ne’e abandona. Ekipamentu eskavatór hahú kee bee dalan liga ona bee ba natar atu agrikultór sira bele hala’i natar ba epoka 2024”, hatete Koordenadór ne’e ba Agência Tatoli, iha postu Uatulari, ohin.
Irrigasaun sira-ne’ebé MAPPF hadi’a maka hanesan irrigasaun Lakumana liga ba natar Osobere-Isi hamutuk purvolta ektare 100 no natar parte Betor nian purvolta etare 70 ne’ebé lokaliza iha postu administrativu Uatulari.
Enkuantu, tuir dadús natar iha área Saelirin no Paetun totál purvolta etare 100, maibé etare 70 maka agrikultór sira halo no etare 30 agrikultór sira abandona tanba bee laiha.
“Maibé natar sira-ne’e ba epoka ne’e ita-nia agrikultór sira halo fila-fali sira-nia natar tanba natar sira-ne’e tinan barak bee labele asesu ba natar. Nune’e ha’u sente agora produsaun hare ita bele hasa’e”, nia haktuir.
MAPPF Viqueque distribui ona hare fini ho varidade Nakroma hamutuk tonelada-neen ba postu Uatulari hodi distribui ba suku sira no kada suku ida sei hetan tonelada ida hodi distribui ba agrikultór sira hodi kuda inklui ba natar área Paetun, Saelirin no Betor.
“Kona-ba haree fini ba epoka ida-ne’e ami prepara ona hein atu distribui ba suku neen, depois estensionista sira distribui ba ita-nia agrikultór sira ne’ebe interese hakarak kuda”. Tenik nia.
Notísia relevante:Autoridade husu governu hadia irrigasaun paetun uatulari
Jornalista : Vitorino Lopes da Costa
Editór : Florencio Miranda Ximenes