iklan

BOBONARO, MUNISÍPIU, SEGURANSA

PNTL asegura ona autór ne’ebé soe bebé iha SMP2 Maliana

PNTL asegura ona autór ne’ebé soe bebé iha SMP2 Maliana

Polísia Nasionál Timor-Leste, Komandu Polisía Munisípiu Bobonaro, Seksaun Investigasaun no VPU halo hela identifikasaun ba autór ne'ebé soe Bebe iha Mota Sagui, Bairu SMP2, aldeia Oplegul, suku Holsa, Postu administrativu Maliana. Imajen Tatoli/Sergio da Cruz (29/02/2024)

BOBONARO, 29 fevereiru 2024 (TATOLI)- KomanduPolísia Nasionál Timor-Leste (PNTL), Munisípiu Bobonaro, liuhosi servisu sekreta, kinta (29/02) asegura ona autór ida ho inisiál LDDM ne’ebé soe Bebé iha mota Sagui, Bairu SMP2, Aldeia Opleguo, suku Holsa, Postu administrativu Maliana, segunda (26/02) ne’e.

“Ohin lokraik ne’e hakarak informa ba públiku katak, komandu munisípiu Bobonaro asegura tiha ona autór ne’ebé mak soe Bebé iha mota Sagui Holsa Maliana,” Komandante PNTL Munisípiu Bobonaro, Superintendente Xefe Agustino Gomes da Silva, informa ba jornalista sira iha Maliana, kinta ne’e

Nia dehan, daudaun ne’e ekipa Servisu Investigasaun Kriminál (SIK) no Seksaun VPU halo hela prosesu identifikasaun.

“Depois ida-ne’e hotu mak ita hatene ninia rezultadu,” Superintendente Xefe Agustino Gomes hateten.

Komandante PNTL Bobonaro ne’e apela atu labele halo tuir aktu hirak-ne’e, tanba ne’e krime no laiha sentimentu umanu.

Hapara fó oan arbiru sein responsabilidade

Ba Mane sira, komandante ne’e husu atu hapara ona fó oan arbiru ba feto sira sein reponsabilidade.

“Labele soe bebé tanba imi ba hola malu tiha, depois imi ba soe ema hanesan animál, asu-han, soe iha mota-laran, ne’ebé hapara ona asaun sira-ne’e. Ba oin, Polisía sei halo asaun sira-ne’ebé represivu no firme hasoru sé de’it maka brani halo asaun irresponsablidade fó oan ba feto ikus laiha reponsabilidade, ikus feto sira ta’uk. Uainhira labarik sira moris buti mate tiha, ne’ebé tenke hapara ona asaun ladi’ak sira ne’e,” nia alerta.

Notísia relevante:PNTL Bobonaro: Bebé ne’ebé mate iha Maliana kauza hosi ema buti kakorok

Jornalista: Sergio da Cruz
Editór: Evaristo Soares Martins

iklan
iklan

Leave a Reply

iklan
error: Content is protected !!