DILI, 29 fevereiru 2024 (TATOLI)—Telekomunikasaun Telemor partisipa Kongresu Mundiál Movel (MWC, sigla inglés) 2024, iha Barcelona-España, durante loron neen, hahú loron 26 fevereiru to’o 02 marsu 2024, hodi foka liu ba esplora no hetan progresu teknolójiku foun sira hodi halo ponte ba divizaun dijitál iha Timor-Leste.
“Partisipasaun Telemor iha kongresu ne’e signifika kompromisu empeza atu hala’o papél importante ida iha Timor-Leste nia viajen transformasaun dijitál, liuhosi hetan teknolojia foun no promove parseria krusiál sira, Telemor nia objetivu mak atu halo ponte ba divizaun dijitál no fó kbiit ba nasaun atu tama ba futuru ida-ne’ebé ligadu no teknolójiku liu,” Diretór Ezekutivu Telemor, Tran Van Bang, hateten liuhosi nota ne’ebé Agência Tatoli asesu, kinta ne’e.
Telemor nia prezensa iha fórum ne’e hatudu dedikasaun hodi lori solusaun ba Timor-Leste, nune’e hein katak sei envolve ho empreza teknolojia no péritu indústria sira ne’ebé lidera atu esplora área xave oin-oin hanesan mapa dijitál ba planeamentu no dezenvolvimentu, sidade sustentável, haforsa sidadaun dijitál no hasa’e edukasaun.
Notísia relevante : Governu tenke avalia operadór telekomunikasaun Timor Telecom-Telemor-Telkomcel
Bazeia ba mapa dijitál ba planeamentu no dezenvolvimentu, Telemor iha posibilidade atu buka parseria ka solusaun atu dezenvolve mapa dijitál ne’ebé komprensivu iha Timor-Leste.
Ida-ne’e sei importante tebes ba dezenvolvimentu infraestrutura, planeamentu urbanu, no esforsu jestaun dezastre iha nasaun ne’e.
Ba sidade sustentável nian, esplora poténsia teknolojia sidade hanesan sistema monitorizasaun, tráfiku no operasaun sistema seguransa públika m&o (monitoramentu no otimizasaun), portál resposta emerjénsia, no sistema analiza data. progresu hirak ne’e iha poténsia atu hadi’a efisiénsia, sustentabilidade no kualidade moris iha sidade Timor-Leste.
Hodi parte haforsa sidadaun dijitál sira, Telemor mós fó ekipamentu ba sidadaun sira ho aplikasaun sira ne’ebé presiza hanesan kakoak, tv timor, no cinema.tl, ne’ebé atu fasilita no halo navigasaun ba timor-oan sira hodi asesu ba mundu dijitál.
“Hasa’e edukasaun hanesan parte ida ne’ebé Telemor mós iha aplikasaun Tfun atu ajuda timor-oan sira atu apreende no hadi’a sira-nia an rasik. Plataforma edukasaun Tfun ne’e hanesan aplikasaun inovativu hanorin nian,” nia tenik.
Jornalista : Arminda Fonseca
Editora : Julia Chatarina
