Veterana Wairaha husu jerasaun foun kria unidade ba dezenvolvimentu
DILI, 29 fevereiru 2024 (TATOLI)—Veterana, Ilda Maria da Conceição ‘Wairaha’, husu ba jerasaun foun sira atu hamutuk kria unidade hodi kontinua ba luta dezenvolvimentu nasaun.
“Ha’u husu ba jerasaun foun sira atu hamutuk kria unidade hodi luta ba ita-nia dezenvolvimentu nasaun nian, tanba ita hotu hatene funu tinan 24 nia-laran atu hetan indepedénsia ne’e la fasil, presiza sakrifísiu no vontante mak foin hetan ukun-an, nune’e agora imi-nia tempu hamutuk luta fali ita-nia dezenvolvimentu nasaun,” Ilda Maria da Conceição ‘Wairaha’, informa ba Agência Tatoli, iha salaun 03 marsu Maubai, Comoro, kinta ne’e.
Nia dehan, Timor-Leste sei komemora loron nasionál veteranu 03 marsu, ne’ebé importante ba sidadaun atu hanoin ba luta-na’in sira ne’ebé fó ona an ona ba rai ne’e hodi hetan ukun-an.
Notísia relevante : MAKLN organiza espozisaun dokumentu istóriku rezisténsia Timor-Leste
Veterana ne’e konsidera, jerasaun foun presiza hamutuk luta ba dezenvolvimentu nasaun, nune’e labele halakon valór luta-na’in sira ne’ebé fó ona sira-nia an mate ba rai ida-ne’e.
“Agora imi tenke kontinua luta fali ba dezenvolvimentu nasaun tanba atu harii dezenvolvimentu iha nasaun ida-ne’e difísil no presiza hotu-hotu ninia kontribuisaun, ita bele deferénsia ida maibé hanoin ba sira ne’ebé mate ona ba rai ne’e hamutuk lori Timór ba oin,” nia tenik.
Jornalista : Arminda Fonseca
Editora : Julia Chatarina
