BOBONARO, 01 marsu 2024 (TATOLI)- Governu liuhosi Ministériu Asuntu Kombatente Libertasaun Nasionál (MACLN, sigla portugés), loke vaga 100 bá kombatente no mártir sira nia-oan iha munisípiu Bobonaro ba tinan letivu 2024 nian
Sekretáriu Ezekutiva CCLN Munisípiu Bobonaro, Moisés Ramos, esplika, prosesu inskrisaun sei hahú iha loron 05 fulan-marsu to’o loron 03 fulan-abríl.
Notísia relevante: MAKLN prevee millaun $1,1 hodi fó bolsa estudu ba veteranu nia oan
“Iha 26 fevereiru Ministru Asuntu Kombatente Libertasaun Nasionál lansa ona programa ne’e, tanba ne’e mak alerta ba kombantente sira-nia oan ne’ebé mak hakarak eskola bele hodi dukumentu mai aplika, lori ho kaderneta, sé karik nia tamat SMA nia tenke halo deklarasaun hosi eskola no deklarasaun matríkula,” nia ko’alia iha Maliana, kinta ne’e.
Sekretáriu Ezekutiva Konsellu Kombatente Munisípiu Bobonaro ne’e hatutan, selesaun refere haree liu valór estudante sira.
“La signifika kombatente sira-nia oan ita hatama de’it, karik kombantente ida nia oan na’in-rua ho valór di’ak ita presiza konsidera,” nia dehan.
Enkuantu vaga hamutuk 100 ne’e ba ensinu báziku ema na’in-lima, ensinu báziku segundu no terseiru siklu 15, Sekundáriu 25, ba universidade 50 no universidade iha rai-liur na’in-lima.
Notísia relevante: Tinan 2022: MAKLN atribui bolsa estudu ba veteranu nia oan 1.300
Jornalista: Sérgio da Cruz
Editór: Evaristo Soares Martins
