CFJJ hetan difikuldade iha ekipamentu no livru ba formasaun
DILI, 01 marsu 2024 (TATOLI)-Diretora Sentru Formasun Jurídika Judisiária (CFJJ, sigla portugés), Marcelina Tilman da Silva, hateten, CFJJ agora daudaun hetan problema iha ekipamentu no livru ensinu ba atividade formasaun.
“Problema ne’ebé mak sentru ida ne’e informa mak komputadór iha rua mak avaria, Ar kondisionál iha sala balun iha sentru ida la funsiona ho di’ak iha balun mak hadi’a ona maibé iha balun sei avaria hela no livru ba ensinu ne’ebé iha ami rai iha biblioteka mós iha balun kle’ur ona presiza atu hola foun,” Marcelina Tilman hateten ba jornalista TATOLI hafoin serimónia abertura VI kursu ba Advogadu Privadu na’in-35 ne’ebé halo iha CFJJ, Caicoli, Dili, sesta ne’e.
Ezekutiva ne’e dehan, problema seluk mak sentru ne’e iha tempu udan kuandu mosu inundasaun entaun bee tama to’o uma-laran afeta ba iha prosesu ensinu formasaun. Dala ruma bee tama makaas entaun pasiénsia formasaun labele kontinua.
“Ita-bo’ot sira haree ami-nia parede sira ne’e dala ruma nakloke, no simente sira fera ona, tanba kauza inundasaun, ida ne’e mak sentru formasaun enfrenta. Ami atu halo intervensaun lalais hodi halo manutensaun no reabilitasaun sira ne’e maibé tanba ami la’ós autonómia finanseira, ami autonómia tékniku de’it, osan iha hotu Ministériu Justisa,”nia informa.
Hatan ba problema ne’e, Ministru Justisa Sergio Hornai hateten, sei tau atensaun ba Sentru Formasaun Jurídiku Judisiáriu liuliu oinsá atu identifika sá problema mak sentru ne’e iha nune’e bele rezolve atu nune’e ba oin sentru ne’e bele fó formasaun ne’ebé di’ak ba timoroan sira.
“Ita sei identifika sá problema mak sentru ne’e iha atu ita bele rezolve atu nune’e sentru ne’e sai duni sentru ne’ebé di’ak hodi prodús ita-nia Juíz, Prokuradór, Defensór, Advogadu inklui Ofisiál Justisa ne’ebé kualidade hodi bele fó asisténsia legál ba ita-nia povu,” Governante ne’e afirma.
Entretantu, Orsamentu Jerál Estadu (OJE) 2024 alokadu ba Ministériu Justisa hamutuk 13.527.213 USD. Husi montante ne’e, orsamentu ba funsionamentu no dezenvolvimentu institusionál hamutuk 3.602.680 USD.
Notísia relevante: SFJJ enfrenta difikuldade hodi garante efetividade no efisiénsia servisu
Jornalista: Natalino Costa
Editór: Rafael Ximenes de A. Belo
