MJ sei konvoka enkontru ho KKSJ ko’alia estabelesimentu STJ
DILI, 01 marsu 2024 (TATOLI)- Ministru Justisa, Segio Hornai, informa, iha tempu-badak nia laran sei konvoka enkontru ho Konsellu Konsultivu Setór Justisa (KKSJ) hodi ko’alia kona-ba estabesimentu Supremu Tribunál Justisa (STJ).
“Kona-ba estabelesimentu Supremu Tribunál Justisa ita iha konsellu konsultivu setór justisa ne’ebé mak envolve mós Ministru Justisa, Prezidente Tribunál Rekursu, Prokuradór Jerál Repúblika Defensór Públiku Jerál atu oinsá bele haree dezeñu polítika liuliu ba Supremu Tribunál futuru,” Segio Hornai hateten ba jornalista sira hafoin halo abertura ba VI formasaun ba advogadu tinan ne’e iha Sentru Formasaun Jurídiku no Judisiária, Caicoli, sesta ne’e.
Nia dehan, ba estabelesimentu Supremu Tribunál Justisa ne’e agora daudaun iha faze preparasaun liuliu haree ba iha estrutura, lei sira inklui mak infraestrutura.
Governante ne’e dehan, kona-ba estrutura ba Juíz Konsilleru ne’ebé atu tuur iha Supremu Tribunál Justisa agora daudaun hahú halo ona identifikasaun ba kuadru pesoál sira liuliu Juíz atu tuur iha STJ ne’e iha hela prosesu nia laran.
“Juíz Konsilleiru ba Tribunál Supremu konserteza ninia preferénsia ita sei haree mós ba iha Juíz sira ne’ebé mak iha liuliu ita-nia kuadru sira ne’ebé agora daudaun servisu hela iha Tribunál Judisiál Primeira Instánsia no mós segundu Juíz sira ne’ebé servisu iha Tribunál Segundu Instánsia hodi nune’e bele aban bainrua sira iha kbi’it halo servisu ne’e iha Supremu Tribunál,” nia adianta.
Sergio Hornai hateten, ba rekrutamentu ba iha Juíz Konsilleiru ne’ebé atu tuur iha Supremu Tribunál Justisa iha tempu-badak sei estabelese ekipa ida atu halo ba rekrutamentu ba ida ne’e tuir lei organizasaun judisiáriu haruka.
“Komisaun ida ne’e sei estabelese atu bele haree rekrutamentu ba Juíz para bele ba iha postu sira Konsilleiru ninian no situasaun ida ne’e la’o dadauk hela,” nia konklui.
Notísia relevante:Lei Organizasaun Judisiáriu Importante Ba Reforma Lejizlativa
Jornalista: Natalino Costa
Editór: Rafael Ximenes de A. Belo
