COVALIMA 02 marsu 2024 (TATOLI)—Sekretaria Estadu Formasaun Profisionál no Empregu (SEPFOPE), sábadu ne’e, fó teste eskrita lian inglés ba kandidatu traballadór timor-oan na’in-3.184 hosi munisípiu Covalima, ne’ebé aplika vaga serbisu bá Austrália liuhosi sistema online.
“Ohin ita realiza programa teste eskrita lian inglés ba kandidatu traballadór ne’ebé rejista tuir sistema online, ne’ebé balun aplika iha tinan 2022 hosi munisípiu Covalima hamutuk 3.184, tuir prosesu Pacific Australian Labour Mobility (PALM) atu bá serbisu iha Austrália,” Diretór Jerál SEFOPE, Carlito do Rosário Cabral, hato’o iha Eskola sekundária Jerál Suai.
Teste ne’e hodi prova aplikante ninia koñesimentu lian inglés, nune’e bainhira pasa no naran tama sistema, traballadór bele iha oportunidade serbisu iha Austrália, tanba ne’e tenke mantein disiplina.
Notísia relevante : SEFOPE envolve PDHJ no CAC iha koresaun matéria ba kandidatu traballadór Austrália
Matéria ho lian inglés kompostu hosi pergunta 50, ho nia kritéria kandidatu tenke responde pegunta 25 ho loos hodi ekipa téknika sira konsidera pasa, bainhira menus hosi 25 la loos maka konsidera la pasa.
Tuir dadus, kandidatu traballadór ne’ebé aplika vaga liuhosi sistema online iha territóriu hamutuk rihun 51, inklui hosi Covalima, ne’ebé hetan vijilante hosi ekipa téknika hamutuk 52 hosi SEFOPE.
“Vijilante ne’ebé tau-matan durante teste la sufisiente, entaun hetan apoiu hosi profesór sira iha Eskola Sekundáriu Jerál Suai,” Diretór akresenta.
Iha biban hanesan, Sekretáriu Munisipál ba Administrasaun Finansa, Alberto Moniz de Araújo, enkoraja kandidatu traballadór sira hodi aproveita oportunidade no tenke kumpre orientasaun hosi SEFOPE, nune’e tenke utiliza tempu ho di’ak hodi prenxe matéria ho di’ak.
Kandidatu traballadór Austrália, Baltazar de Deus, agradese ba SEFOPE tanba konsege hala’o ona prosesu teste lian inglés iha ida-idak ninia munisípiu, hodi fó oportunidade ba joven sira hodi aplika via online no la presiza halo viajen bá Dili.
Jornalista : Celestina Teles
Editora : Julia Chatarina
