Top

Tribunál aplika medida koasaun AP ba arguidu envolve kazu omisídiu iha Becuse

Arguidu sira ba kazu Bekusi-Tribunál Judisiál Primeira Instánsia Dili halo interrogatóriu dahuluk ba arguidu na’in-neen iha Kolmera, sábadu (02/03/2024). Imajen Natalino Costa

DILI, 02 marsu 2024 (TATOLI)—Tribunál Judisiál Primeira Instánsia Dili, sábadu ne’e, halo interrogatóriu dahuluk ba arguidu na’in-neen, ne’ebé envolve iha kazu omisídiu hodi halakon Armandinho Lemos Soares nia vida, iha área Becuse, postu admistrativu Cristo Rei, munisipiu Dili.

Arguidu hirak ne’e ho inisiál DG, MX, SCG,LVS, LA no HJ.

Kazu ne’e akontese iha kuarta (28/02) madrugada, ne’ebé vítima Armandinho Lemos Soares ho nia kolega ida kondús motorizada sai iha hosi uma Becuse Sentrál, aldeia Karrega Tiru atu bá Metiaut.

Bainhira to’o iha área Metiaut, vítima ho nia kolega deskonfia foti subar bibi ida iha área ne’ebá no sira rua tula bibi ne’e ho motór. Momentu ne’e, Armandinho rasik mak kaer bibi ne’e, bainhira to’o iha área Ponte BJ Habibie, sira na’in-rua kondús motorizada liu bá dirasaun ponte My Friend atu fa’an bibi ne’e iha merkadu.

Maibé, bainhira to’o iha área ponte My Friend, Armandinho ho nia kolega la konsege fa’an bibi ne’e no sira ho motór bá fali área Taibesi nian. Nune’e, bainhira tama iha rotunda Taibesi, sira hetan tan kolega na’in-rua ho motór hodi sira la’o hamutuk bá Becuse.

To’o iha Becuse, Armandinho tuur iha motór leten no kontinua kaer bibi ne’e, nune’e bibi ne’e namek maka’as, halo joven no komunidade iha Becuse rona. Entaun, joven sira mai tuda fatuk  hasoru Armandinho ho nia kolega na’in-tolu seluk, hodi halo kona Armandinho ne’ebé tuur iha motór kotuk, ne’ebé kona iha parte ulun, nune’e Armandinho monu ba rai hodi nia ulun baku tan ba estrada no ran sai barak to’o hakotu hakotu iis iha tuku 04:00 madrugada. Armandinho latan de’it iha estrada Becuse nian, enkuantu ninia kolega na’in-tolu seluk ho motorizada halai ses.

Notísia relevante : PNTL detein suspeitu na’in lima ligadu ho kazu Becusse   

Ho nune’e, Polísia Nasionál Timor-Leste (PNTL) Eskudra Cristo Rei no parte investigadór sira tun kedan bá fatin akontesimentu hodi asegura vítima no fatin akontesimentu.

Iha prosesu interrogatóriu dahuluk, Ministériu Públiku (MP), ne’ebé reprezenta hosi Prokuradora, Ivonia Guterres, promove arguidu sira ho krime omisídiu, ne’ebé previstu iha artigu 141 hosi Kódigu Penál Timor-Leste.

Iha alegesaun MP, husu ba Tribunál atu aplika medida koasaun Prizaun Preventiva ba arguidu sira tanba iha indísiu katak arguidu na’in-neen envolve iha kazu ne’e hodi hakotu Armandinho Lemos Soares nia vida.

Hafoin interrogatóriu dahuluk, Defeza hosi arguidu sira, Advogadu Privadu, Pedro Aparício, hateten, Tribunál aplika medida koasaun Aprezentasaun Períodika (AP) ba arguidu na’in-neen.

“Sira tenke aprezenta-an ba Polísia, semana ida dala-tolu, ba postu Polísia ne’ebé besik. Kuandu sira la aprezenta-an loron-ida de’it ba Polísia, maka Polísia tenke halo kedan kapturasaun ba sira iha momentu ne’e kedan. Ida-ne’e mak despaixu hosi Tribunál nian,” Pedro Aparício, dehan ba jornalista sira, hafoin interrogatóriu dahuluk, iha Tribunál Judisiál Primeira Instánsia Dili, Colmera.

Maski nune’e, Advogadu la fó razaun klaru tanba sá mak Tribunál aplika medida koasaun Aprezentasaun Periódika.

“Ida-ne’e segredu justisa, ida-ne’e mak prosesu inkéritu, ne’ebé rezultadu mak ida-ne’e,” nia akresenta.

Pedro Aparício esplika, medida koasaun ne’e la signifika kazu ramata ona, maibé nu’udar medida ida hodi husu ba arguidu sira atu kolabora ba iha investigasaun kazu tanba kazu ne’e seidauk ramata.

Enkuantu, hafoin Juiza, Maria Solana, hatún despaixu hodi aplika AP ba arguidu na’in-neen,, hosi parte família matebian Armandinho Lemos Soares la konkorda ho desizaun Tribunál, nune’e família, liu-liu inan no aman hosi matebian husu Tribunál atu aplika Prizaun Preventiva ba arguidu na’in-neen.

Tuir família, arguidu sira envolve duni kazu ne’ebé hamate Armandinho Lemos Soares, tanba ne’e Tribunál tuir loloos aplika Prizaun Preventiva.

Ho situasaun ne’e, família matebian Armandinho Lemos Soares halo ataka ba família hosi arguidu na’in-neen, hodi hamosu dezentendimentu iha areadór Tribunál nian tanba la satisfaz ho desizaun Tribunál.

Tuir observasaun jornalista Agência Tatoli, nota katak família matebian Armandinho Lemos Soares kontinua kontesta hasoru desizaun Tribunál durante minutu 30 nia laran.

Hafoin ida-ne’e, parte PNTL halo kedan intervensaun hodi hakalma kedan família vítima, nune’e situasaun komesa konduzivu filafali.

Interrogatóriu dahuluk ne’e prezide hosi Juíza Turnu, Maria Solana, vítima reprezenta hosi Prokuradora, Ivonia Guterres, enkuantu arguidu sira hetan asisténsia hosi Advogadu Privadu, Pedro Aprimício.

Jornalista     : Natalino Costa

Editora          : Julia Chatarina

Publisidade

Leave a Reply

Latest Post

error: Content is protected !!