DILI, 03 marsu 2024 (TATOLI)– Veteranu Marcelino da Cunha “Teki”, husu líder nasionál hanesan atuál Primeiru Ministru Kay Rala Xanana Gusmão, Taur Matan Ruak, Francisco Guterres Lú Olo no Mari Alkatiri presiza hamutuk hodi lori dezenvolvimentu nasionál.
“Istória triste liu mak katuas sira la hamutuk ne’e, nu’udar ema terus na’in katak diferénsa ideia iha país demokrátiku ne’e normál.
Maibé tenke hamutuk tiha nune’e bele lori rai ne’e ba oin, agora iha funu laran ema mate hamlaha di’ak hela, no buka hamutuk mas ukun aan tiha tanba de’it polítika,” Veteranu Teki hateten ba Agência Tatoli, iha resintu Palásiu Governu, domingu ne’e.
Tanba tuir nia, Timor-Leste ukun aan tinan 20-resin ona maibé dezenvolvimentu nasionál seidauk la’o di’ak.
“Sé la hamutuk mak ita sai hanesan ne’e, oinsá mak bele dezenvolve rai ne’e, ideia la hanesan ne’e prontu, eleisaun hotu tinan lima ukun ne’e ita tenke hamutuk, no ida ne’ebé la ukun tenke submete ba ida ukun ne’e. Partidu tau ba kotuk, tempu kampaña idak-idak ninia planu ida-ne’e mak tau iha nia fatin. La’ós líder nasionál na’in haat ne’e de’it mak tenke hamutuk, maibé ba hotu-hotu hamutuk. Kuandu ida ukun ona ne’e mak tau ideia hamutuk, lori dezenvolvimentu nasionál ne’ebé ba futuru ne’ebé di’ak no prósperu. Ita labele halo terus ita-nia joven sira,” nia hateten.
Entretantu, veteranu Agapito da Conceição, hateten líder nasionál la hamutuk ne’e ida-idak nia opiniaun, labele to’o iha-ne’eba.
“Ida ne’e ha’u labele fó komentáriu tanba líder ida-idak nia opiniaun,” nia hateten.
Notísia relevante: PR enkoraja Asosiasaun Veteranu partisipa ativu iha prosesu diversifikasaun ekonómika-sosiál
Jornalista: Osória Marques
Jornalista: Evaristo Soares Martins
