BOBONARO, 03 marsu 2024 (TATOLI)-Prezidente Autoridade Munisípiu (PAM) Bobonaro, Ernesto de Oliveira Barreto, husu veteranu sira hotu atu nafatin sólidu no unidade hanesan uluk hodi kontribui bá dezenvolvimentu nasionál tálanba luta ba povu nia moris di’ak seidauk hotu.
Ernesto de Oliveira hato’o apelu ne’e iha nia diskursu ba serimónia hasa’e Bandeira Nasionál iha komemorasaun loron Veteranu 03 marsu ba dala-hitu ne’ebé realiza iha kampu futeból Maliana, domingu ne’e.
Notísia relevante: CCLN Bobonaro sei realiza sertame hodi komemora loron veteranu
“Ha’u husu ba veteranu sira hotu, tenke hamutuk, veteranu tenke iha unidade,blabele haree ba kór, tanba uluk ita funu atu liberta ita-nia rai, ohin loron hetan ona liberdade,nmaibé ita-nia povu barak sei terus, liuliu sira-ne’ebé hela iha foho-leten, entaun signifika ke ita-nia funu seidauk hotu,” nia hateten.
Nia enkoraja veteranu sira atu partisipa no apoia iha kualkér dezenvolvimentu ne’ebé governu implementa iha suku no aldeia.
“Iha buat ruma ke ladi’ak,nfó hatene mai prezidente autoridade, atu nune’e fiskalizasaun bele tún ba haree buat naksalak sira la’o iha suku no aldeia, tanba ne’e osan povu nian, ita labele halimar, ita hasai osan atubele halo buat ruma,” nia hateten.
Veteranu Apolinário Barros, ‘Fuik’, hateten veteranu sira munisípiu Bobonaro sei unidade hela, maibé tanba deferensa ideolojia polítika balu la kumpri ona prinsípiu luta ne’ebe sira hala’o iha ai-alaran.
Tuir nia, veteranu labele radikál liu ba partidu polítiku no tanba veteranus la’ós instrumentu polítiku.
“Ita veteranu tenke hatudu ezemplu di’ak ba ita nia rai, ba ita-nia munisípiu, labele Veteranu tiha mak hatudu ezemplu aat ba joven, ne’e ema dehan veteranu falsu tanba ema-nia atitude laloos, ita veteranu ne’e la haree ba kór, veteranu iha objetivu la’o hosi 1975 mai to’o agora atu liberta rai no liberta povu,nmaibé agora povu ita seidauk liberta totál,” nia katak.
Nia mos husu ba veteranu sira-ne’ebé eziste iha munisípiu Bobonaro, atu koopera hamutuk ho Prezidente Autoridade Munisipál foun ne’ebé sei simu pose iha kuarta loron (06/03/2024), nune’e bele tau matan ba povu nia halerik.
“Ida-ne’e mak ita bele povu nia vida no sira sira-nia hakarak kona-bá estrada, bee-moos, eskola no buat sira seluk tan, ida-ne’e mak ita-nia interese ba ita-nia nasaun,” nia tenik.
Vise-Prezidente Konsellu Veteranu Munisípiu Bobonaro, Lúcio Diniz Marques ‘Onsar’, sente kontente no agradese tanba tinan ne’e bele selebra loron veteranu iha idak-idak nia Munisípiu.
“Ami durante ne’e komemora 03 marsu ne’e iha konsentra iha nasionál de’it, maibé ohin konsege hala’o iha ita-nia munisípiu hodi halibur veteranu sira hotu, hodi la’o tuir dalan liuliu ita-nia oan sira. Ema lubuk ida mate ne’e iha fornteira Bobonaro ne’e oinsá, ida-ne’e mak ita komemora hodi hatudu ba sira katak ita la haluha sira,” nia dehan.
Notísia relevante: Veteranus Labele Impede Dezenvolvimentu
Jornalista: Sérgio da Cruz
Editór: Evaristo Soares Martins
