AIFAESA fulan-tolu ona lahalo atividade inspesaun tanba laiha funsionáriu
DILI, 04 marsu 2024 (TATOLI)–Autoridade Inspesaun no Fiskalizasaun Atividade Ekonómika, Sanitária no Alimentár, Institutu Públiku (AIFAESA, I.P) durante fulan-tolu ona, desde fulan-janeiru to’o marsu ne’e seidauk halo atividade inspesaun ba produtu importadu tanba laiha funsionáriu.
“Ha’u atu hato’o katak preokupasan ne’ebé durante ne’e ha’u akompaña maka ami labele atende tantu preukupasaun mai hosi membru Parlamentu Nasionál, individuu ka pesoál sira, ami labele halo buat ida ho razaun mak laiha funsionáriu,” Inspetór Jerál AIFAESA, I.P, Ernesto Monteiro, relata ba Agência Tatoli, I.P, iha ninia knaar fatin, Matadouro, segunda ne’e.
AIFAESA hahú hosi janeiru 2024 to’o ohin loron seidauk halo atividade inspesaun hanesan tinan hirak liubá tanba funsionáriu ne’ebé durante ne’e halo serbisu, sira-nia kontratu ramata iha 31 dezembru 2023.
Nia dehan, AIFAESA, I.P ninia funsionáriu destakadu no funsionáriu kontratadu, ne’e dekretu-lei númeru 26/2016 define kona-ba funsionáriu ka traballadór iha AIFAESA, I.P. Liga ba kuantidade funsionáriu públiku destakadu na’in-lima inklui Inspetór mak iha hela AIFAESA, restante 118 ka 96% hosi funsionáriu kontratadu, hosi totál funsionáriu 123.
“Tanba saida mak seidauk bele kontinua fó kontratu, tanba iha loron 17 dezembru 2023, iha notifikasaun ida mai hosi Ministériu tutela, Ministru Koordenadór Asuntu Ekonómiku, Francisco Kalbuadi Lay ba dirijente hotu, katak funsionáriu kontratu ramata iha 31 dezembru 2023, laiha fatin atubele estende, ho nune’e agora ami hein de’it desizaun tuir-mai hosi ministériu hodi funsiona hikas atividade. Tanba ha’u mesak de’it tuur iha ne’e (edifísiu) simu de’it keixa ida mai hosi populasaun maibé ha’u labele atende,” nia esplika.
Notísia relevante : Inspetór AIFAESA, I.P espera MKAE bele konsidera estende kontratu funsionáriu 118
Durante ne’e, Autoridade la’ós de’it simu keixa sira mai hosi komunidade maibé notifikasaun mai hosi Ministériu Públiku no Tribunál tanba instituisaun ne’e ninia papél maka fahe informasaun ka hato’o keixa ba Ministériu Públiku ligadu ho produtu apreensaun sira.
“Ne’ebé ha’u resposta notifikasaun ne’e katak husu atu suspende lai tanba daudaun tékniku liu-liu parte jurídiku laiha, notifikasaun seluk mós mai hosi Tribunál Baucau no ida hosi Suai ne’e husu atu sai sasin ba iha julgamentu maibé tanba pesoál ne’ebé naran temi iha notifikasaun ne’e seidauk renova kontratu, entaun ne’e ha’u hatán katak ami labele atende pedidu ida-ne’e,” nia tenik.
Ministru Koordenadór Asuntu Ekonómiku, Francisco Kalbuadi Lay konvoka ona reuniaun ida iha loron 19 fevereiru 2024, hodi orienta dirijente sira atu hato’o programa nomós proposta sira liu-liu liga ba ezekusaun Orsamentu Estadu 2024.
“Ha’u hato’o katak programa sira ne’e presiza ema ka funsionáriu maka bele hala’o, entaun funsionáriu laiha ne’e oinsá, ne’ebé ha’u haruka lista funsionáriu sira ne’ebé kontratu termina ba Ministériu Koordenadór Asuntu Ekonómiku, no to’o agora seidauk iha desizaun katak sé mak bele kontinua no sé mak labele kontinua, loos duni fó kompeténsia ba mai nu’udar dirijente maibé ami presiza orientasaun, ne’ebé desizaun to’o ohin loron seidauk, avaliasaun ne’e ami haruka de’it lista funsionáriu 118 ne’e ba ministériu, kompostu hosi seguransa, pesoál limpeza, motorista, no funsionáriu xave sira seluk,” nia informa.
Jornalista : Antónia Gusmão
Editora : Julia Chatarina
