DILI, 04 marsu 2024 (TATOLI)- Prezidente Autoridade Portuários de Timor-Leste (APORTIL), Feliciano da Costa Correia, hateten, APORTIL iha koñesimentu kona-ba atrakasaun ró rua hosi Japaun Yushin Maru II no Yushin III ne’ebé mak atraka iha Portu Dili.
“Ró Yushin Maru II no Yushin III ho tipu peskiza mai hosi tasi-klaran (laut bebas) hodi mai traka iha ne’e hahú iha loron 29 fulan fevereiru to’o 03 marsu 2024 no agora daudaun fila ona no tuir karta ami simu katak ró ahi ne’e mai iha ne’e atu ense mina no troka tripulante,” Feliciano Correia ba jornalista sira iha nia kna’ar fatin, Farol, segunda ne’e.
Nia dehan, ró Yushin Maru II ne’e lori tripulante na’in 20 no Yushin Maru III tripulante 22 durante atraka iha iha Portu Dili ró ne’e halo tuir prosedura ne’ebé mak iha.
Tanba molok sira atu atraka iha portu Dili ró ne’e informa uluk ba nia ajénsia iha Timor-Leste naran Faocean nune’e ajénsia mak koordena ho Diresaun Nasionál Transporte Marítima (DNTM) nune’e DNTM informa mai APORTIL hodi prepara kondisaun ba atraka nian.
Prezidente APORTIL, Feliciano Correia dehan, hafoin ró ne’e atraka iha Portu Dili, Servisu Migrasaun halo kedan pasa revista Pasaporte ba Tripulante sira ró rua ne’e inklui parte Ministériu Saúde halo kedan inspesaun ba tripulante sira ne’e.
Tanba ne’e tuir prosedimentu mak nune’e, kualker ró ahi atu mai para iha portu tenke halo ida ne’e no karik ró ne’e fila mós tenke autoridade kompetente tenke halo hanesan ne’e.
Feliciano dezmente ho informasaun ne’ebé iha rede sosiál katak ró Yushin Maru II no Yushin III la halo nia misaun hanesan peskiza, maibé tama tasi Timór hodi foti subar rikusoin timor nian tanba fotografia ne’ebé publika la hanesan ho ró Yushin Maru II no Yushin III ne’ebé atraka iha Portu.
“Ita haree jeralmente ró iha fotografia ne’ebé ema públika iha rede sosiál ho ró atraka iha ne’e marka modelu la hanesan,” nia konklui.
Notísia relevante:MNEK rejeita ró Japaun “Yushin Maru” foti ikan iha tasi Timor
Jornalista: Natalino Costa
Editór: Rafael Ximenes de A. Belo
