DILI, 04 marsu 2024 (TATOLI)—Prezidente Grupu Muller Parlamentár (GMPTL), Deputada Aliança da Conceição, husu Governu atu kolabora ho parte relevante sira hodi haforsa sensibilizasaun kona-ba edukasaun seksuál ho edukasaun reprodutivu ba joven sira hodi kombate kazu soe bebé iha rai-laran.
Notísia Relevante: Autoridade relijioza konsidera soe bebé la valoriza ema-nia moris
“Parte Governu mós presiza kolabora ho entidade hotu-hotu hanesan eskola, igreja, família no komunidade atu apoiu Aliansa Nasionál Kombate Krime Infantísidu hodi bele halo sensibilizasaun kona-ba edukasaun seksuál ho edukasaun reprodutivu ho nune’e joven idade hosi 15 ba leten bele iha koñesimentu kle’an liu kona-ba asuntu ida-ne’e,” Prezidente GMPTL ne’e hato’o liuhosi intervensaun iha reuniaun plenária PN, segunda ne’e.
Nia preokupa, semana kotuk ema soe bebé iha postu Maliana, munisípiu Bobonaro, nune’e apresia ba serbisu PNTL tanba konsege detein suspeitu soe bebé refere.
Hanoin situasaun ne’e la’ós foin akontese maibé biebeik ona, tanba ne’e, aleinde sesnsibilizasaunkona-ba edukasaun seksuál ho edukasaun reprodutivu no presiza apoiu hosi ema hotu hanesan fortifika lei protesaun ba labarik no joven iha perígu liuhosi sensibilizasaun.
Deputada Aliança apresia serbisu komisaun F iha PN ne’ebé hala’o hela serbisu sensibilizasaun ba lei protesaun ba labarik no joven iha perígu.
Notísia Relevante: INDDICA: Ministériu relevante tenke prevee osan ba implementasaun lei protesaun labarik
Jornalista : Nelson de Sousa
Editór : Cancio Ximenes
