DILI, 05 outubru 2023 (TATOLI)—Prezidente Institutu Nasionál Defeza Direitu ba Labarik (INDDICA, sigla portugés), Dinorah Granadeiro, hateten ministériu relevante tenke prevee osan atu implementa Lei Protesaun labarik no joven iha perigu nia laran ne’e, nune’e bele tau ba asaun no prátika.
Notísia Relevante: MSSI presiza kria mekanizmu implementa Lei Protesaun Labarik-Joven iha perigu
“Ministériu sira relevante ami, MSSI, Ministériu Públiku, SEI, PNTL ne’e rasik inklui instituisaun tuteladu sira tenke esforsu atu oinsá mak hatama nia orsamentu ba 2024 nian, hodi nune’e bele implementa lei ne’e. Se lae, ninia implementasaun labele la’o,” Prezidente INDDICA ne’e hateten Agência Tatoli, bainhira partisipa kolókiu kona-ba validasaun ba planu estratéjiku SEI nian ba tinan 2023-2028, iha City8, Manleuana, Has-Laran, kinta ne’e.
Tanba ne’e, nia hateten, MSSI iha obrigasaun atu prepara nia mekanizmu ba ninia implementasaun sira, tanba atu responde ba ida-ne’e presiza fasilidade lubuk ida hodi ezije implementa hosi ezisténsia lei ne’e rasik.
“Hosi ne’e mak ita tau iha prátika no tenke tau ona orsamentu hodi responde ba implementasaun. Se la prevee osan, mak ita sei la implementa lei ne’e ho di’ak,” nia dehan.
Nia hateten, lei refere ne’e iha pozitivu tebes tanba maiória hakilar kona-ba asuntu labarik, tanba lei ne’e sei bele fó protesaun ba labarik sira-ne’ebé iha situasaun defisil nia laran.
“Lei proetsaun labarik no joven iha perigu nia laran ne’e, ita-nia komisaun F iha Parlamentu Nasionál iha inisiativa rasik halo diskusaun atu bele iha interpretasaun di’ak ba iha lei ne’e rasik. Ha’u hanoin ida-ne’e meiu ida di’ak, tanba lei ne’e foun entaun ita hotu-hotu presiza esforsu atu kompreende konteúdu lei ne’e artigu por artigu, hodi nune’e iha futuru ninia implementasaun tau ho asaun no la’o di’ak no susesu,” nia dehan.
Nai dehan, bainhira lei ne’e envigór ona tenke implementa ona maibé nia situasaun mak implementa lei ida presiza rekursu umanu, fasilidade no instituisaun sira-ne’e prontu implementa ka lae.
Notísia Relevante: INDDICA sensibiliza lei protesaun labarik ba membru F-FDTL
Jornalista : Osória Marques
Editór : Cancio Ximenes
