DILI, 14 jullu 2023 (TATOLI)–Prezidente Institutu Nasionál Defeza Direitu ba Labarik (INDDICA-sigla portugés), Dinorah Granadeiro, hateten MSSI presiza kria mekanizmu ba implementasaun Lei Protesaun Labarik no Joven iha Perigu nia-laran.
Notísia Relevante: PN aprova projetu-lei protesaun ba labarik iha finál globál
“Lei protesaun labarik no joven perigu nia-laran ne’ebé hetan ona promulgasaun hosi Prezidente Repúblika, maibé presiza nia mekanizmu balun. Entaun, lei ne’e nia responsabilidade mak MSSI entaun MSSI tenke kria mekanizmu, atu implementa lei ne’e ita presiza Standar Operasional Padraun ida, ne’ebé sai matadalan ida ba instituisaun hotu-hotu atu bele la’o tuir,” nia dehan ba Agência Tatoli, iha nia kna’ar fatin, sesa ne’e.
Ho mekanizmu liuhosi Standar Operasional Padraun (SOP), nia dehan, mak oinsá bele fó atendimentu ba labarik no oinsá atende joven sira, maibé se ida-ne’e laiha entaun atendimentu sei baralla.
“Tanba ne’e, MSSI iha obrigasaun atu prepara nia mekanizmu ba ninia implementasaun sira. Atu responde ba ida-ne’e presiza fasilidade lubuk ida hodi ezije implementa hosi ezisténsia lei ne’e rasik. Hosi ne’e mak ita tau iha prátika no tenke tau ona orsamentu hodi responde ba implementasaun. Se la prevee osan mak ita sei la implementa lei ne’e ho di’ak,” nia dehan.
Dinorah hateten, Lei refere ne’e iha pozitivu tebes tanba maiória hakilar kona-ba asuntu labarik, tanba lei ne’e sei bele fó protesaun ba labarik sira ne’ebé iha situasaun defisil nia laran.
Notísia Relevante: Sensibilizasaun projetu-lei protesaun ba labarik sei hein Governu foun
“Ita espera katak lei ne’e ita-nia governante sira bele asesivel, nune’e bele tau iha prátika. Lei ne’e di’ak loos to’o iha ne’ebé maibé kuandu la tau osan mak nia implementasaun sei la la’o ho di’ak. Presiza duni osan, rekursu umanu, fasilidade. Ezemplu, konkretu ida mak ita la implementa lei kona-ba testemuña tanba laiha fasilidade inklui rekursu umanu ne’ebé laiha,” nia dehan.
Nune’e MSSI, Ministériu Saúde, Ministériu Públiku, tenke esforsu nune’e bele implementa tanba sira mak iha papel importante no iha responsabilidade.
Entaun, ba lei protesaun labarik no joven iha perigu nia-laran ne’e, labele implementa iha tinan ne’e tanba foin aprova fulan rua liubá no mós la prevee nia orsamentu.
“Iha IX Governu Konstitusionál ne’e, buat ne’ebé ami hakarak no kontinuidade tau iha prioridade mak asuntu traballu infantil, tan ne’e IX Governu tenke tau prioridade ba ida-ne’e. Ida-ne’e iha enkontru entre MSSI, ha’u foti kestaun kona-ba dekretu-lei ida-ne’e nian, tanba lei kontra traballu to’o agora pendente hela, no espera katak ami bele dudu lei Ida-ne’e ho lei kodigu labarik nian,” nia dehan.
Notísia Relevante: Aprovasaun lei protesaun ba labarik fó benefísiu ba labarik sira
Jornalista : Osória Marques
Editór : Cancio Ximenes
