DILI, 04 marsu 2024 (TATOLI)–Diretora Jerál Ministériu Ensinu Superiór Siénsia no Kuktura (MESSK), Filomena Maria Lay, hatete, Insitutu Superiór Cristal (ISC), Dili Institute of Technology (DIT), no Institutu of Buissines (IOB), mak loke ona klasse paralelu iha munisípiu sira.
“Agora ne’ebé ativa hela mak Cristal nian iha Aileu, Manufahi, no Baucau nian, DIT nian iha Rejiaun Administrativa Espesiál Oé-cusse Ambeno (RAEOA), IOB nian iha Maliana Bobonaro nian. Ida-ne’e tinan kotuk ami simu lista paralelu maibé ba tinan ida-ne’e ami seidauk simu tanba situasaun balun ne’ebé ministériu tenke tau nia pozisaun, mak nia kondisaun hanesan mós ho instituisaun iha sentrál sira,” Diretora ne’e hateten ba Agência Tatoli hafoin partisipa ASEAN Traveling Resource Person Programme (ATRP), iha salaun MSSI, Caicoli, segunda ne’e.
Instituisaun ensinu superior hirak ne’e prienxe hela rekezitu no iha lisensa operasionál no prienxe ona rekezitu 10 hanesan mós estabelese instituisaun foun liuhosi avaliasaun.
“Kona-ba avaliasaun nian mak halai ba rai, rekursu infraestrutura, rekursu umanu hanorin nian. Agora buat ne’ebé Ministériu tau importánsia liu mak rekursu infraestrutura nian tanba loke instituisaun ida tenke iha sustentabilidade mak tenke dosente permanente. Tanba iha kritériu ida mak mínimu dosente permanente rua iha Departamentu ida, labele kontratadu. Kuandu atu garante sustentabilidade no mós garante kualidade manorin, nune’e tutan ba ita-nia estudante sira,” nia dehan.
Kritériu 10 ne’ebé Ajénsia Nasionál Avaliasaun no Akreditasaun Akadémika (ANAAA) aplika ba instituisaun ensino superior hotu tantu públiku no privadu
Hosi kritériu 10 ne’e iha kritériu lima (5) kona ba rekursu uumanu hatete katak manorin ne’ebé hanorin iha ensinu superiór (lisensiatura) tenke ho graun mestradu (S2) no mós manorin ne’ebé hanorin S2 tenke mai ho grau doutoramentu (S3).
Jornalista : Osória Marques
Editór : Cancio Ximenes
