VIQUEQUE, 04 marsu 2024 (TATOLI)-Grupu peskadór hosi suku Fatudere, postu administravu Viqueque Villa, munisípiu Viqueque, daudaun ne’e enfrenta problema laiha fatin atu rai ikan molok sira lori bá faan iha merkadu.
Membru hosi Grupu Salva Moris, Salvadór Almeida Sances, hateten antes ne’e, governu apoia ona ró peska ba peskadór sira hodi kaer iha tasi aréa Fatudere nian maibé, tanba laiha fatin atu konserva ka rai ikan sira ne’e maka ikan barak tenki so’e estraga.
Notísia Relevante :Grupu peskadór iha Manatuto simu ró neen husi MAPPF
“Ami husu ba Governu hodi kria fatin rai ikan nian ida iha ami-nia suku Fatudere tanba dala ruma ami ba ka’er ikan barak lori ba faan ema la sosa, entaun ami soe de’it tanba laiha fatin di’ak ida hodi rai ikan,” Nia hateten ba jornalisira TATOLI, iha tasi aréa suku Fatudere, segunda ne’e.
Iha mandatu governasaun anteriór nian ukun, nia dehan konsege hari’I ona fatin rai ikan ba peskadór sira iha suku Fatudere nian iha tinan 2006 no 2007 liubá hodi fasilita peskadór sira hodi rai sira-nia ikan bainhira halo atividade peska lor-loron nian, maibé daudaun ne’e la utiliza tanba uma ne’e anin sobu ona.
“Agora fatin rai ikan laiha ne’e ami ba ka’er ikan bainhira hetan tenke esforsu ba faan hotu. Se la hotu mak balun sai dodok tenke soe ida-ne’e ami sente triste tanba ami gasta tempu iha tasi laran hetan tiha rezultadu ikus estraga,” nia hateten.
Tanba ne’e, nia sujere ba Governu da IX liuhosi Sekretáriu Estadu Peska, atu reabilita uma ne’ebé oras ne’e abandona hodi kompleta mós jelera atu nune’e bele fasilita peskadór sira hodi rai sira-nia ikan antes lori bá faan iha merkadu.
Nia esplika kada loron sira bele hetan osan hosi atividade peska hodi ba faan iha merkadu hahu hosi USD 30 to’o USD 40 hodi sustenta oan sira nia osan eskola no nesesidade família nian.
“Ró ne’ebé foin lalais ami simu ne’e agora dadaun ami uza ona kada loron ida ami ka’er ikan iha tasi laran bele hetan $30 barak liu $ 40. Dala ruma ikan barak ema la sosa hotu balun sai dodok tiha,” Nia hateten.
Hatan ba preokupasaun ne’e, Diretór Servisu Agrikultura munisípiu Viqueque, Joaquin Fernandes, hateten Servisu Agrikultura munisípiu nian rejista ona preokupasaun kona-ba peskadór suku Faudere nian no oras ne’e relata ona ba governu sentrál hodi fó atensaun iha futuru.
“Ita-nia peskadór sira-nia prekupasaun atu kria fatin armazén ka loja ikan ne’e importante duni atu fasilita ita-nia peskadór sira bainhira ba ka’er ikan sira bele hatama. Ho preokupasaun sira-ne’e ha’u aprezenta ona ba nasionál ita hein de’it bainhira maka sira bele deside hodi estabelese armazén ikan nian,” tenik tan.
Alende ne’e, hadi’a fatin rai ikan iha suku Fatudere, Servisu Agrikultura munisípiu Viqueuque iha suku Maluru, Alembata lokaliza iha suku Babulu no postu Uatucarbau.
Notísia Relevante :Governu sei distribui bero fiberglass ba peskadór sira iha Viqueque
Jornalista :Vitorino Lopes da Costa
Editór :Agapito dos Santos
