iklan

EKONOMIA, HEADLINE

Grupu peskadór iha Manatuto simu ró neen husi MAPPF

Grupu peskadór iha Manatuto simu ró neen husi MAPPF

Grupu peskadór iha Manatuto simu ró husi MAPPF.

DILI, 09 fevereiru 2024 (TATOLI) – Grupu peskadór iha Manatuto simu ró peska neen husi Ministériu Agrikultura, Pekuária, Peska no Floresta (MAPPF) atu ajuda sira-nian atividade peskeira nian hodi hasa’e rendimentu família.

Diretór-Jerál Peska, Celestino da Cunha Barreto, hatete distribuisaun ró ne’e hala’o ona ohin no peskadór sira bele utiliza ró refere, maibé bainhira bá peska tenke aprezenta relatóriu ba ekipa koletór dadus peska nian ne’ebé instala ona iha kada munisípiu sira, nune’e bele relata fali dadus mai iha nasionál.

Diretór-Jerál Peska, Celestino da Cunha Barreto.

“Kada loron pesakdór sira kaer ikan tenke relata mai koletór sira mínimu kilógrama 25 no másimu 50, maibé depende ba situasaun no importante maka tenke iha relatóriu”, diretór-jerál hatete ba Tatoli, ohin.

Dirijente ne’e realsa katak ho apoiu ró husi Governu ba peskadór sira ne’e la signifika katak ejize sira tenke kaer ikan barak, maibé depende ba atividade peska no nia iklima. “Karik tempu di’ak bele hetan ikan barak, maibé kuandu ladi’ak, ikan menus ne’e laiha buat ida, importante maka tenke iha relatóriu”, reitera.

Kona-ba manutensaun ba ró sira ne’e kada grupu maka sei toma responsabilidade, nune’e bele kontinua garante nia kondisaun di’ak.

Grupu peskadór iha Manatuto simu ró husi MAPPF.

Aleinde fó ba peskadór iha Manatuto, MAPPF mós sei disponibiliza, iha fulan ne’e, ró 10 ba peskadór sira iha Covalima ne’ebé mak sei hetan neen, Ainaro rua no Lautém rua.

Total ró ne’ebé MAPPF sosa iha tinan 2022 hamutuk 110  ho montante osan rihun $5 no ró ne’e ho nia kapasidade PK15. Ba 2024, Governu tau tan verba rihun $200 hodi sosa tan ró besik 40.

“Orsamentu atu sosa tan ró 40 ne’e tama ona iha planu bainhira prezisa ita sei hato’o proposta hodi sosa”, dehan.

Jornalista: Tomé Amado

Editora: Maria Auxiliadora

iklan
iklan

Leave a Reply

iklan
error: Content is protected !!