DILI, 04 marsu 2024 (TATOLI)–Sekretaria Estadu Formasaun Profisionál no Empregu (SEFOPE) klarifika katak lista pergunta ba kandidatu traballadór timor-oan bá serbisu iha Austrália, ne’ebé daudaun espalla iha públiku ne’e laloos, tanba pergunta ne’ebé fahe ba kada munisípiu ne’e lahanesan.
“Matéria teste ba kandidatu traballadór Austrália ne’ebé lansa ona iha Oé-cusee no munisípiu haat ne’ebé mosu iha públiku, iha ema irresponsabilidade lansa informasaun falsu iha públiku katak matéria ezame ne’e ‘bocor’ ona ka espalla ona iha ita-nia joven sira-nia liman. Ida-ne’e atu hateten katak informasaun ne’e falsu, ne’ebé atu dehan lista pergunta ba teste ne’e kada munisípiu lahanesan,” Sekretáriu Estadu, Rogério Araújo Mendonça, hato’o klarifikasaun ne’e liuhosi konferénsia imprensa, iha salaun SEFOPE, Caicoli, segunda ne’e.
Notísia relevante : SEFOPE envolve PDHJ no CAC iha koresaun matéria ba kandidatu traballadór Austrália
Governante ne’e fó razaun katak elaborasaun matéria ezame ne’e la’ós de’it ekipa hosi SEFOPE maibé kolabora ho Pacific Australian Labour Facility (PALF).
“Atu hala’o atividade ida-ne’e, dirijente no funsionáriu SEFOPE desloka ba munisípiu hodi akompaña nune’e bele garante kualidade. Informasaun katak funsionáriu balun mak espalla matéria, atu dehan matéria ne’ebé prodús la’ós SEFOPE mak elabora de’it maibé serbisu ekipa,” nia akresenta.
Nune’e, SEFOPE garante katak teste ne’e kualidade, tanba ne’e husu ba entidade sé de’it, tenke hatudu evidénsia ruma ne’ebé hatudu funsionáriu balun envolve.
SEFOPE prepara ona karta hodi hato’o keixa ba Polísia Servisu Investigasaun Kriminál (PSIK) hasoru joven ne’ebé espalla informasaun ne’e, atu nune’e bele investiga, nune’e bainhira prova iha funsionáriu balun envolve fahe matéria ezame ba públiku maka tenke simu responsabilidade ba ninia aktu.
Antes ne’e, ekipa téknika realiza ona teste eskrita lian inglés ba kandidatu traballadór iha Oé-cusse, Aileu, Manufahi, Covalima no Ainaro.
Jornalista : Antónia Gusmão
Editora : Julia Chatarina
