DILI, 04 marsu 2024 (TATOLI)—Veteranu José Agostinho Sequeira ‘Somotxo’, husu lidér nasionál sira hamutuk halo diálogu nasionál ida hodi tau hanoin hamutuk ba dezenvolvimentu nasaun nian, nune’e sai ezemplu ba jerasaun foun sira.
“Iha tempu badak hanoin líder nasionál sira bele halo diálogu nasionál ida hamutuk filafali hodi hanoin dezenvolvimentu nasaun nian, ida-ne’e presiza halo tanba hanoin to’o tinan 2028 sira labele ona esforsu hotu, ne’ebé sira bele halo maibé matenek la’ós aumenta maibé tun. Tanba ida-ne’e mak presiza sira tuur hamutuk, nune’e sai hanesan ezemplu ida ba jerasaun foun sira,” Somotxo hateten liuhosi programa entrevista eskluziva iha Agência Tatoli, Farol, segunda ne’e.
Nia dehan, lider antigu sira ne’ebé presiza tuur hamutuk filafali hodi hanoin ba dezenvolvimentu nasaun nian mak hanesan Kay Rala Xanana Gusmão, Marí Alkatiri, Taur Matan Ruak, Lere Anan Timur, no Francisco Guterres ‘Lú-Olo’.
“Karik sira ne’e difísil tuur hamutuk, iha dalan seluk liuhosi instutuisaun barak liu-liu ita-nia igreja katólika iha, dala-ida tan sira halo sakrifísiu halibur filafali líder antigu sira ne’e, hamutuk bele dezenvolve Timor-Leste no sai ezemplu ba jerasaun foun sira atu la’o tuir,” nia akresenta.
Notísia relevante : Líder nasionál sira tenke hamutuk iha prosesu dezenvolvimentu
Veteran ne’e mós husu ba parte partidu polítiku sira hotu atu kria unidade iha nasaun ne’e tanba Timor-Leste hetan nia indepedénsia ne’e maihosi unidade ne’ebé halo hamutuk hodi defende objetivu manán funu.
“Ohin loron ha’u bele kompreende ita-nia partidu barak, maibé husu nafatin tenke hanoin objetivu ida de’it mak estabilidade dezenvolvimentu ba rai ne’e nian,” nia fó hanoin.
Ko’alia kona-ba estabilidade ida-ne’e presiza joven sira fó atensaun ba buat rua hanesan polítika nível seguransa no governativa.
“Tanba bainhira atu halo dezenvolvimentu tenke iha estabilidade. Atu hetan estabilidade nia dalan mak iha Planu Dezenvolvimentu Estratéjiku mak halo ita han malu ita tenke hadi’a planu estratéjika ne’e, iha programa polítiku mak ita han malu tenke hadi’a programa polítiku ne’e, ka ideolojia mak ohin loron ita han malu, ita tenke tuur hamutuk hili ideolojia loloos ba Timor-Leste,” nia salienta.
Nune’e, nia husu ba partidu polítiku idadak hodi fó kontribuisaun ba estabilidade polítika, estabilidade governativa no estabilidade nível seguransa.
“Ba joven sira uluk, ami luta iha tinan 24 ne’e, Indonézia konsidera ita hanesan fatuk ida iha nia sapatu laran, maibé ikus mai ita manán funu, maibé tempu agora mak oho malu kria problema, ha’u triste bainhira laiha estabilidade no lahadomi malu, nu’udar ema ba Estadu Timor-Leste, mak estabilidade ka problema sira ne’ebé mosu sei hanesan fatuk ida ba Estadu Timor-Leste nia sapatu laran,” Somotxo dehan.
Jornalista : Arminda Fonseca
Editora : Julia Chatarina
