iklan

COVALIMA, HEADLINE

Vítima dezastre naturál ne’ebé simu materiál ladauk finaliza konstrusaun uma

Vítima dezastre naturál ne’ebé simu materiál ladauk finaliza konstrusaun uma

Komandante APC Covalima, Inspetór Xefe Flávio Mendes. Imajen Tatoli/Celestina Teles.

COVALIMA, 04 marsu 2024 (TATOLI) –  Vítima dezastre naturál hamutuk família 94 iha Covalima seidauk finaliza konstrusaun ba sira-nia abitasaun depois simu materiál ba rekuperasaun uma nian, relata dadus husi Autoridade Protesaun Sivíl (APC-Sigla portugés) Covalima.

Komandante APC, Inspetór Xefe Flávio Mendes, hatete uma-kain 94 ne’e mai husi postu administrativu Fatululik 15, Maucatar ualu, Fohorem 24, Tilomar rua no Zumalai 45

“Ami identifika vítima hirak ne’ebé mak simu ona materiál rekuperasaun, balun seidauk halo konstrusaun, balun seidauk finaliza konstursaun uma, tanba prosesu konstrusaun foin mak atinje 50%” ,  Inspetór Xefe Flavio Mende hatete iha Santa Rosa, ohin.

Nia esplika katak, tuir loloos bainhira vítima sira simu materiál husi Governu no fó tempu ba sira durante fulan-tolu atu halo konstrusaun ba sira-nian abitasaun, maibé liu ona fulan tolu prosesu konstrusaun foin mak atinje 50%. “Vítima sira balun foin mak hahú konstrusaun iha faze halo fondasi, batako, fui sinta leten, taka ona zinku no balun konsege hela ona”, dehan.

APC halo distribuisaun materiál rekuperasaun no orsamentu mão de obra ba vítima ba dezastre naturál bazeia ba Dekretu-lei númeru 7/2021, 22 juñu, iha artigu 9 kona-ba apoiu materiál no artigu 10 kona-ba apoiu subsídiu.

Tanba ne’e, nia husu ba vítima sira ne’ebé mak simu materiál ba rekuperasaun uma tenke konstrui abitasaun, tanba Governu gasta osan hodi sosa materiál no apoia orsamentu mão de obra, maibé balun uza fali ba intrese privadu. Nune’e, APC kontinua fó hanoin to’o dala tolu mak la finaliza mak sei lori prosesu bá iha Tribunál.

Rekorde katak, iha dezembru 2022 no 2023, APC Covalima rejista vítima katástrofe hamutuk-139  ho tipu dezastre naturál hanesan rai halai hamutuk hitu,  ahi han uma haat, anin sobu uma 128.

Durante APC halo verifikasaun dadus ba vítima refere hetan estragu husi dezastre naturál ho tipu sira hanesan aat kmaan 67, natoon 24, aat totál 47 ne’ebé hetan ona apoiu materiál.

Aleinde ne’e, dadus dezastre husi janeiru to’o fevereiru 2024 hamutuk 88 ne’ebé mak atu halo prosesu ba nasionál hodibele hetan materiál rekouperasaun no orsamentu mão de obra tuir nivel estragu ne’ebé sira iha, maibé família 10 hetan de’it apoiu emerjénsia ai-han no la’os ai-han tanba la preinse kritériu simu materiál.

Administradór postu Maucatar, Laurentino  de Jesus, dehan nia parte foin asume knaar no promete sei buka hatene vítima dezastre naturál hirak ne’ebé mak simu ona materiál ba rekuperasaun uma,  maibé seidauk finaliza konstrusaun uma.

Notísia relevante: Celina, vítima dezastre naturál ne’ebé hein apoiu materiál ba rekuperasaun uma

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!