DILI, 05 marsu 2024 (TATOLI)—Asosiasaun Defisiénsia Timor-Leste (ADTL) hetan kontribuisaun hosi Governu Austrália liuhosi Department of Foreign Affairs and Trade (DFAT) kada tinan.
“Kontribuisaun ne’ebé ita jere hodi hala’o atividade ADTL nian la’ós hosi Governu maibé maihosi parseiru Department of Foreign Affairs and Trade, ne’ebé kada tinan apoia ita hahú hosi rihun $120 to’o rihun $130 ba atividade sira hanesan advokasia no edukasaun. Parte advokasia ne’e ba inkluzaun no sosiál, ba edukasaun nian mak kapasitasaun programa no empoderamentu organizasaun sira,” Diretór Ezekutivu ADTL, Cesário da Silva, informa ba Agência Tatoli, iha ninia knaar fatin, Mascarinhas, Dili, tersa ne’e.
Governu liuhosi Ministériu Juventude Desportu Arte no Kultura (MJDAK) iha tinan antes ne’e apoia orsamentu ba programa akampamentu, ne’ebé kada tinan hetan $40.000 maibé ba tinan ne’e seidauk hetan.
Notísia relevante : ADTL husu governu kria fatin hodi fó atendimentu ba ema ho defisiénsia mentál
Asosiasaun nia programa prioridade mak kontinua nafatin advokasia, ne’ebé mós hanesan planu prioridade ida hosi estrutura Konsellu Fiskal ADTL, ne’ebé foin lalais eleitu ba períodu tinan-lima (2024-2028).
Estrutura Konsellu Fiskál kompostu hosi Prezidente ADTL, Crecência Madeira de Deus, Vise-Prezidente ADTL, Gaspar Afonso, Sekretáriu, Alfredo dos Santos, Tezoreira, Domingos Sávio Gusmão no Reprezentante Feto Defisiénsia mak Luisa Teresinha Gusmão.
Asosiasaun mós husu ba Governu atu fó kontribuisaun naton hodi bele tau matan ba ema ho dfisiénsia sira.
“Ami hakarak kontribuisaun ne’e mós bele iha kanál ida, ezemplu ADTL bele lidera kanál ka finansiamentu ida ba nia membru organizasaun sira, entaun ami hakarak kontribuisaun ne’e Governu aloka mai ADTL mak fahe ba membru sira, atu ami bele akompaña bainhira sira halo ezekusaun,” nia sujere.
Jornalista : Arminda Fonseca
Editora : Julia Chatarina
