iklan

NASIONÁL, HEADLINE, INKLUZAUN SOSIÁL

ADTL propoin ema ho defisiénsia 25 asesu UNTL tinan ne’e

ADTL propoin ema ho defisiénsia 25 asesu UNTL tinan ne’e

Universidade Nacional Timor Lorosa'e (UNTL). Imajen Tatoli/Francisco Sony.

DILI, 05 marsu 2024 (TATOLI)—Asosiasaun Defisiénsia Timor-Leste (ADTL) serbisu hamutuk ho Ministériu Ensinu Superiór Siénsia no Kultura (MSSK), liuhosi rejime espesiál propoin ema ho defisiénsia hamutuk 25 asesu edukasaun iha Universidade Nasionál Timor-Lorosa’e (UNTL), tinan ne’e.

“Ema ho defisiénsia ne’ebé asesu ona universidade privadu no públiku iha Timor-Leste hamutuk 200 resin, universidade privadu mak hanesan Institute of Bussiness (IOB), Universidade da Paz (UNPAZ) no Universidade Oriental Timor-Lorosa’e (UNITAL). Ema ho defisiénsia sira ne’ebé asesu ba universidade kompostu hosi ema ho defisiénsia fíziku, matan, tilun no seluk tan,” Diretór Ezekutivu ADTL, Cesário da Silva, informa ba Agência Tatoli, iha ninia knaar fatin, Marcarinhas, tersa ne’e.

Cesário dehan, ema ho defisiénsia sira ne’ebé asesu edukasaun iha universidade privadu ne’e, sira na’in rasik mak selu eskola maibé ADTL halo koordenasaun ho universidade sira hodi halo diskontu 50% hosi totál propina ne’ebé eskola aplika.

“ADTL só bele tulun sira iha parte ekipamentu, fasilita matéria ba ema ho defisiénsia, maibé kona-ba selu eskola sira na’in rasik selu,” nia akresenta.

Notísia relevante : ADTL husu governu kria fatin hodi fó atendimentu ba ema ho defisiénsia mentál

Antes ne’e, Diretór Interinu Asosiasaun Halibur Defisiénsia Matan Timor-Leste (AHDMTL), Gabriel Ponciano de Sousa, preokupa ho asesibilidade infraestrutura eskola ba ema ho defisiénsia hirak ne’ebé asesu ba edukasaun.

“Ami ema kondisaun defisiénsia mós lakohi lakon asesu ba edukasaun. Tanba ne’e, ami nafatın esforsu atubele asesu hanesan mós ema la ho defisiénsia sira. Ami hakarak rekomenda katak Governu presiza duni tau atesaun ba asuntu ne’e,” nia tenik.

Tuir relatórnu Planu Asaun Nasional ba Ema ho Defisiensia (PANED) 2014-2018, ne’ebé publikadu hosi Diretoria Nasionál Estatístika Ministériu Finansa nian, hatudu katak ema 48.243 ne’ebé hela iha Timor, hosi totál populasaun 1.066 409 ka 4,6% ho kondisaun defisiénsia, kompostu hosi ema ho defisiénsia fízika 20.593, matan 29.488, tilun 17.692, intelektuál no saúde mentál hamutuk 13.308.

Hosi persentajen ne’e, mane 53% no feto 47%, enkuantu otas entre tinan 0 to’o 19 iha 10,5% по defisiénsia sai hetok komún iha área rurál sira.

Jornalista     : Arminda Fonseca

Editora          : Julia  Chatarina

iklan
iklan

Leave a Reply

iklan
error: Content is protected !!