AMRT sei hapara konstrusaun Jardim de Chama Eterna
DILI, 05 marsu 2024 (TATOLI)–Diretór Ezekutivu Arkivu Muzeu Rezisténsia Timorense, Institutu Públiku (AMRT, I.P, sigla portugés), Jorge Alves “We Moris”, husu kompañia kontratór sira atu aselera prosesu kontrusaun projetu Chama Eterna maibé bainhira tarde mak sei hapara ka kansela.
Notísia Relevante: Governu suspende provizóriu konstrusaun Jardim de Chama Eterna
“Ha’u husu atu aselera konstrusaun ne’e. Ha’u husu ba kompañia sira katak problema saida mak to’o atrazu ne’e, maibé prontu iha fallansu entre sira ho sira. Ha’u ladún apar ho asuntu ne’e, maibé ha’u hateten ba empreza Star King ho Aitula atu aselera konstrusaun ne’e. Ha’u hakarak tinan ne’e tenke ramata ona. Tinan ne’e mak la finaliza entaun ha’u sei fó sansaun ba sira mak tenke hapara ka kansela konstrusaun ne’e”, Diretór Ezekutivu AMRT, I.P ne’e hateten ba Agência Tatoli iha nia kna’ar fatin, tersa ne’e.
Tuir nia, konstrusaun ne’e hahú iha VIII Governu Konstitusionál nia mandat no IX Governu Konstitusionál kontinua de’it konstrusaun ne’e no ida-ne’e monumentu ida hodi relembra fali istória Timor-Leste nian.
“Konstrusaun ne’e seidauk finaliza no atrazu tebes, tanba nia fizikamente ba projetu ne’e foin mak nahe hosi kraik. Ida-ne’e mós ha’u mai tiha ne’e mak foin nahe, antes ne’e seidauk ida. Sira só kee-rai de’it, ha’u agora kontrola hela,” nia dehan.
Prosesu konstrusaun ba projetu ne’e ho nia durasaun han to’o fulan 18, ne’ebé konstrusaun ne’e hahú iha 09 fevereiru 2022 to’o 10 agostu 2024 maibé seidauk haree nia progresu fíziku.
“Ha’u bolu ho empreza kontratór sira halo reuniaun no ha’u husu ba sira tanbasá mak konstrusaun atrazu. Prontu, sira dehan tanba bee, entaun prontu ita akompañia. Ha’u sei la fó dalan ba sira atu demora prosesu konstrusaun ne’e, nune’e iha semana oin ha’u sei bolu fali sira atu mai reuniaun ho ami inklui diretór sira iha ne’e,” nia hateten.
Jardim de Chama Eterna ne’e, tuir istória katak monumentu ida-ne’ebé mak atu hatudu ba mundu katak istória Timor-Leste nian ne’e maihosi nakukun, tanba ne’e mak AMRT. I.P halo konstrusaun ida-ne’e atu memoriza eroi sira-ne’ebé fó sira-nia vida tomak ba rai no povu ida-ne’e.
Jardim de Chama Eterna ne’e refleta ba prosesu luta ukun rasik-aan nian, tanba liafuan “Chama Eterna” ne’e katak matebian hosi loromonu-lorosa’e, tasi feto-tasi mane buka masin ho ahu karik, mai iha Jardim de Chama Eterna ne’e hodi deskansa depois mak fila.
Kontratór ba projetu Chama Eterna mak Star King Konstrusaun, Lda, no halo parseria ho DMF asesu Unipessoal, Lda, ho nia montante osan hamutuk $4.548.172,69.
Notísia Relevante: Jardin Chama Eterna símbolu rekoñesimentu Estadu ba saudozu mate funu laran
Jornalista : Osória Marques
Editor : Cancio Ximenes
