DILI, 05 marsu 2024 (TATOLI)—Diresaun Nasionál Transporte Terrestre (DNTT) husu ba públiku, liu-liu motorista sira atu nafatin respeita regra ka sirkulár, ne’ebé fó sai ona iha loron 20 fevereiru 2024, kona-ba mudansa ba sirkulasaun transporte públiku bus, nune’e bele evita asidente.
Oráriu sirkulasaun ba bus mak hanesan dadeersan tuku 06:00 dadeer sai hosi munisípiu orijen no lorkraik tuku 18:00 iha ona destinasaun (fatin).
“Hafoin sirkular ne’e ita lansa, hahú iha loron 01 marsu, motorista sira kumpre ona halo movimentu iha tempu loron de’it, ida-ne’e ha’u husu atu kumpre nafatin tanba ita hasai sirkulár ne’e ho objetivu atu evita asidente sira,” Xefe Departamentu Sekretariadu Apoiu Tékniku Administrasaun DNTT, Nelson Sequeira Martins, informa ba Agência Tatoli, iha ninia knaar fatin, DNTT, tersa ne’e.
Hahú 01 marsu to’o agora, parte DNTT seidauk simu informasaun ruma hosi parte Polísia Tranzitu, ne’ebé informa katak motorista sira kontra regra hanesan halo operasaun iha tempu kalan.
“Ida-ne’e signifika sira kumpre regra sira ne’ebé estabelese ona,” nia akresenta.
Notísia relevante : Hahú marsu, bus hotu halo sirkulasaun iha tempu loron
Nia dehan, bainhira motorista sira balun kontra regra ne’e maka parte Polísia Tránzitu sei atua tanba iha ona koordenasaun ho parte DNTT.
Iha sorin seluk, Nelson Sequeira, hato’o kona-ba motorista transporte públiku sira ne’ebé tula pasajeiru no sasán liu kapasidade ne’e parte Polísia Tránzitu mak sei haree no fó sansaun tanba sira mak kontrola movimentu iha estrada públika.
“DNTT ho Polísia Tránzitu sei kontinua implementa regra sira ne’e tuir kódigu estrada ne’ebé rigor hodi hamenus asidente tránzitu iha nasaun ne’e,” nia tenik.
Bainhira públiku ka motorista sira la kumpre mak sei fó sansaun tuir artigu 40 kódigu estrada nian, sei selu koima hahú $45.
Jornalista : Arminda Fonseca
Editora : Julia Chatarina
