OÉ-CUSSE, 05 marsu 2024 (TATOLI) – Jestór sub-rejiaun Pássabe, Paulino Marques, husu Autoridade Rejiaun Administrativa Espesiál Oé-Cusse Ambeno (RAEOA), lideradu Rogério Tiago Lobato, atu tau priodade ba kondisaun estrada rurál sira iha Pássabe.
Notísia relevante: Paulino Marques simu pose nu’udar jestór sub-rejiaun Pássabe
“Ha’u reprezenta populasaun iha suku Abani no Malelat, ho hakraik-an fó hanoin ba Prezidente Autoridade RAEOA, no koordenadór ZEESM, atu tau nafatin atensaun ba dezenvolve área hotu, liuliu infraestrutura bázika inklui estrada hodi kontribui dudu kresimentu ekonomia familiár, ho nune’e iha futuru Pássabe bele hadi’a-aan hanesan imajen furak RAEOA iha parte súl hosi odamatan Lifau,” Paulino Marques hateten.
Rekomendasaun hanesan hato’o hosi Eis jestór sub-rejiaun Pássabe, Anton Ulan, espera ho prezensa Autoridade foun bele rezolve ona kondisaun infraestrutura sira iha Pássabe.
“Prezidente Autoridade ho Koordenadór ZEESM, ohin hatene ona, Pássabe iha ne’ebé, Pássabe espesiál tebes iha iha foho, no presiza atividade di’ak atubele dezenvolve iha-ne’e, tán ne’e husu ba Autoridade bele tau matan ba ami Pássabe,” nia katak.
Nia dehan, durante tinan 10-resin assume kargu nu’udar jestór, laiha oportunidade atu apoia ho finansa, ida-ne’e problema boot ba autoridade lokál, bainhira koloka mai iha postu no suku maibé laiha apoia finansa atubele halo buat ruma.
“Maske ha’u mai ho hanoin di’ak atubele tau ba ita-nia postu maibé kbiit maka lato’o, tán ne’e durante tinan barak, ida-ne’e la hanoin kona hosi autoridade sira no Governu Sentrál, maibé esperansa boot, ho kolega Paulino Marques nia lideransa durante mandatu, ajuda netik atubele halo buat ruma, ami prontu atu kolabora, maibé bainhira kuandu hanesan de’it ho ha’u, laiha buat ruma atu apoia, entaun situasaun sira-ne’e sei la muda,” nia fó hanoin.
Hatán ba rekomendasaun Prezidente Autoridade RAEOA, Rogério Tiago Lobato, konsidera importante nune’e sei rejista iha orsamentu retifikativu 2024 nian.
“Estrada mai iha-ne’e ladi’ak, ida-ne’e tenke iha investimentu hosi Estadu, tanba estrada ne’e hanesan uat, dalan mai to’o Oésilo, Waskita Karya dalaruma ita tenke hanoin ona atu loke konkursu foun, ba estrada mai Pássabe.”
Entretantu, bazea sensu populasaun 2015, hatudu, iha sub-rejiaun Pássabe totál populasaun 1.817, komposta hosi suku rua, suku Abani hamutuk 1.455 mai hosi aldeia tolu, Haemnanu, Naetuna no aldeia Pássabe, no suku Malelat populasaun hamutuk 362 ho aldeia ida de’it.
Jornalista: Abílio Elo Nini
Editór: Evaristo Soares Martins
