OÉ-CUSSE, 05 marsu 2024 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), lideradu Rogério Tiago Lobato, tersa ne’e, realiza serimónia pose ba eis jornalista Rádiu Televizaun Timor-Leste, Empreza Públika (RTTL,EP), Paulino Marques, asume kargu foun nu’udar jestór sub-rejiaun Pássabe bá mandatu tinan lima, hosi 2024 to’o 2028.
Notísia relevante: Paulino Marques hetan fiar sai nu’udar Jestór Pássabe
Iha serimónia pose ne’e, Prezidente Autoridade RAEOA, Rogério Tiago Lobato, agradese ba jestór sub-rejiaun sesante tanba durante ne’e apoia ona servisu estatál iha nível baze.
Eis Ministru Interiór ne’e, rekomenda ba jestór foun atu koopera malu, atu halo levantamentu kona-bá problema sira-ne’ebé akontese iha sub-rejiaun Pássabe.
“Primeiru nia tenke halo povu Pássabe hamutuk, tanba primeira vez suku Malelat bele foti ema ida ba administradór postu, tanba tinan naruk sempre iha de’it suku Abani, ida-ne’e hanesan jestu ida kapaas unidade iha povu Pássabe, agora saida maka nia tenki halo, primeiru nia tenke halo levantamentu, tenke ko’alia didi’ak ho jestór sesante ne’e, atu haree problema sira-ne’ebé akontese iha-ne’e, sasán saida mak la kompletu depois halo relatóriu bazea mós ho sesante hato’o ba nia,” Rogério Lobato, ko’alia iha ámbitu serimónia pose ne’e.
Iha biban ne’e, Jestór nomeadu, Paulino Marques, agradese ba konfiansa, no promete sei hametin liña koordenasaun ho komponente hotu iha suku Abani ho Malelat, atu luta hasa’e produsaun agríkola hodi minimiza dependénsia produtu importasaun.
“Ha’u agradesu ba Governu Sentrál no Autoridade RAEOA, ne’ebé fó fiar mai ha’u, atu asumi kna’ar hanesan, administradór postu administrativu (Sub-Rejiaun) Pássabe ba tinan lima oin mai, ida-ne’e nu’udar biban ida hodi kontribui direita ba dezenvolvimentu iha aspetu hotu, atu liberta povu iha suku Abani no Malelat, hosi kondisaun difisil ne’ebé iha,” nia orgullu.
Notísia relevante: Iha Passabe, PNDS implementa obra lima korresponde ba nesesidade komunidade
Eis Jornalista RTTL,EP ne’e, fundamenta, mehi ne’ebé atu atinje ba moris di’ak iha futuru bele alkansa liuhosi unidade hametin liña koordenasaun no prommove kooperasaun di’ak, entre komponente hotu iha komunidade suku rua ne’e.
“Tanba ne’e, maun alin estrutura kulturál sira iha suku Abani no Malelat, liuliu intelektuál sira, mai ita hamutuk halibur ideia konstrutiva, pasu konkretu, no oferese kbi’it ne’ebé ita iha, atu dezenvolve postu administrativu Pássabe, espesiál hasa’e kuantidade no kualidade produsaun agríkola hodi minimiza dependénsia ba importasaun,” nia afirma.
Jestór sesante Antón Ulan, asumu kargu nu’udar jestór sub-rejiaun Pássabe dezde 2008 to’o 2024 ne’e, no promete sei koopera atu servisu hamutuk ho líder foun, nune’e bele dezenvolve di’ak liután sub-rejiaun Pássabe durante mandatu.
“Durante tempu naruk espera, katak ita tenke troka malu atubele kompleta ba malu, tan ne’e ohin, akontese, ita sei koopera malu, atu lori Pássabe ba oin, durante ne’e funsionáriu estatál ema na’in-rua de’it, maibé agora ida mai tán, ida-ne’e ami orgullu tebes, no ha’u prontu atu servisu kolabora hamutuk ho nia, tanba nu’udar funsionáriu públiku ida atu serbí la’ós ataka malu,” nia promete.
Notísia relevante: Protesaun Sivíl rejista uma 14 iha Pássabe presiza rekuperasaun
Entretantu, bazea sensu populasaun 2015, hatudu, iha sub-rejiaun Pássabe iha uma-kain 1.817, komposta hosi suku rua, suku Abani hamutuk 1.455 mai hosi aldeia tolu, Haemnanu, Naetuna no aldeia Pássabe, no suku Malelat populasaun hamutuk 362 ho aldeia ida de’it.
Jornalista: Abílio Elo Nini
Editór: Evaristo Soares Martins
